web counter
LEXO PA REKLAMA!

SHKARKO APP

App Store
Google Play

E fundit!

x

Nga Arian Galdini/ Faleminderit Mihal!

18 Gusht 2019, 09:55, Opinione CNA

U desh kacavjerrja silvesterstalloneske e Mihalit mbi makinën e spanjollëve që të gjithë të shihnim me zë e figurë të vërtetën e madhe mbi gjithë kulturën agresive që karakterizon pothuajse në një masë të madhe mënyrën sesi ne e duam përfitimin.

Pa përgjithësuar aspak, ripërsëris se kjo masa e madhe është masë aq kritike sa na thërret e ulëret për ta marë seriozisht. Ne bëjmë tregëti me ushqime të skaduara dhe tregëtari është i lumtur që fiton para duke helmuar bashkëqytetarët e tij.Ne prodhojmë e shesim produkte bujqësore e blegrotale të shiringuara me hormone, kimikate e pesticide dhe fermeri e tregëtari janë të lumtur që fitojnë para duke helmuar bashkëqytetarët e tyre.

Ne sjellim ilaçe të skaduara apo të falsifikuara, i transportojmë ilaçet me motora e furgona specash dhe grosisti farmaceutik është i lumtur që bën pasuri duke helmatisur bashkëqytetarët e tij. Ne shkojmë në Kinë e bëjmë marrëveshje çmimi duke manipuluar atje cilësinë e çdo produkti dhe sipërmarësit tanë janë të lumtur që fitojnë shumë para duke na shitur shtrenjtë mallra të këqija e të dëmshme.

Ne kemi ndërtues që bëjnë pallate duke vënë dorë mbi materiale e cilësi ndërtimi e lumturohen që bëjnë miliona duke i lënë bashkëqytetarët e tyre në mëshirë të Zotit, që kurrë mos ndodhtë tërmet këtu.Për herë të parë në Shqipëri, kemi të listuar si shkaktarë kryesorë kancerit, cilësinë ushqimore, cilësinë e ajrit dhe cilësinë e materialeve të ndërtimit.

Shteti është kaçak. Qeveria është kaçake.Sipërmarrësi është kaçak. Partitë janë kaçake. Politikanët janë kaçakë. Shteti u bën keq qytetarëve që të bëjë buxhet.Partitë u bëjnë keq qytetarëve që të bëjnë plaçkë e pushtet. Politikanët u bëjnë keq qytetarëve që të bëjnë plaçkë e pushtet.

Sipërmarrësit u bëjnë keq qytetarëve që të bëjnë pasuri e katandi. Jemi në një cikël vrastar ku pasurimi i disave duhet të kalojë patjetër nga shtegu i krimit.
Gjyjatësit e Prokurorët shesin drejtësinë. Taksidarët vënë gjoba për shtetin e gjoba për xhepin. Politikanët e partitë i blejnë votat 20 euro dhe i shesin vendet e punës 5000 euro. Hapësirat dhe territoret në Shqipëri nuk shihen si harta e mundësi zhvillimi por si zgëqe  pasurimi.

Madje edhe buka që hamë bëhet me miell kafshësh i ardhur nga Serbia. Nga copa e bukës që fusim në trup e deri tek shtëpia ku fusim trupin, ne jemi nën agresion helmrash që pasurojnë një pakicë e na gjymtojnë neve të gjithëve.Kapedan Mihali që iu turr makinës së spanjollëve, ishte manifestimi më i sinqertë i të vërtetës së madhe ku ne mbijetojmë. Ai rrezikoi kokën, për një faturë.

Ata spanjollë që u rrebeluan tek Restoranti në Porto Palermo, u kthyen në ngucësit e pashmangshëm të atij reagimi prej kaçaku të Mihalit sepse me të drejtë ky është zënë ngushtë. Mihali e mijëra Mihalë të tjerë këtë bëjnë natyramisht çdo ditë.Mihalë pafund kemi në politikë që na vjedhin, plaçkisin e poshtërojnë.

A i keni parë Mihalët e Qeverisë dhe Politikës si reagojnë kur dikush ua thotë të vërtetën, duke ua tollovitur rendin me të cilin janë mësuar?Ky Mihali që kemi sot Kryeministër, kë pyeti për ta bërë zyrën e Kryeministrit të Shqipërisë si akomodim personal me flutura e psikedelizma sipas shijeve thellësisht private?

Ky Mihali që kemi sot Kryeministër e dje Kryebashkiak të Tiranës, cilin plan urbanistik e zhvillimor konsultoi kur bëri si i deshi qejfi atë Bunker-Shtëpinë e tij private?A nuk është sjellë ky si kaçak vetë edhe me zyrën e Kryeministrit të Shqipërisë edhe me ndërtimin atipik të shtëpisë së tij private?

Ndërtimet, zaptimet e shërbimet kaçakiste të Mihalëve në qeveri, parti, politikë, sipërmarrje e ngado, janë thjeshtësisht dhe natyralisht të tilla, Far West dhe Kap ç’a t’kapësh.Rrebelimi i pafajshëm i spanjollëve thjesht takoi një Mihal të sinqertë dhe psikopat që krejt normalisht reagoi si vrastar për një të drejtë që ai e quan në krahun e tij.

Të fitosh para duke zaptuar, helmuar, cënuar cilësinë, duke bërë hile, është mënyra sesi shihet rendi i gjërave në vendin tonë. Të fitosh pushtet duke blerë e shitur shpirtra, duke bërë ujdi me krimin e banditët, duke vjedhur e bërë plaçkë, është mënyra sesi shihet rendi i gjërave në vendin tonë.

Provojeni, rrebelohuni si spanjollët tek Restoranti në Porto Palermo, rrebelohuni kundër Mihalëve të politikës, partive, e sipërmarrjes e do ta shihni se Kapedani i Qeparoit është thjesht një episod qesharak dhe skizofrenik.  Mihalët e politikës dhe partive po vrasin Shqipërinë e po përzënë shqiptarët, e nuk ka kush tu flasë. Sepse ne kemi Mihalë, por nuk jemi spanjollë./CNA.al





Lajmet e fundit nga