Kriza politike e ka emrin Ilir Meta, apo ai është zgjidhja e saj?!

16 Gusht 2019, 12:02, Aktualitet CNA

Vendi po hyn në një fazë të re të krizës politike, pas gati gjashtë muajsh nga djegia e mandateve të deputetëve të opozitës, në 16 shkurt të këtij viti.

Vendi po hyn në një krizë të re, apo në një cikël të ri krizash që po pasohet nga Shkodra, nga zgjedhjet lokale në këtë qytet, ku një kandidat për kryebashkiak, Valdrin Pjetri rezultoi se ishte dënuar në Itali me burg. Një çështje që pritet ende të sqarohet, por politikisht i ka dhënë fund karrierës së tij.

Por, Shkodra po lë një gjurmë e cila pritet të sjellë një cikël të ri krize në muajin shtator.

Kryetari i bashkisë nuk bën betimin, Këshilli Bashkiak konstituohet. Kemi një Këshill të ri, por pa kryetar.

Voltana Ademi, pas katër ditësh, pra në datën 20 e mbaron mandatin e saj. Ajo duhet të largohet nga zyra dhe dikush tjetër duhet ta drejtojë Bashkinë e Shkodrës. Një nga nënkryetarët, kryetari i Këshillit apo ndonjë i emëruar nga kryeministri, kjo varet sesi do të interpretohet ligji dhe se cila do të jetë zgjidhja.

Por, kur bie një kryebashkiak, kur ai shkarkohet apo nuk betohet etj, procedura që njeh ligji është se duhet të shpallen zgjedhjet dhe këtë duhet ta bëjë presidenti brenda 45 ditëve.

Duhen bërë zgjedhjet për të zgjedhur kryebashkiakun e ri të Shkodrës.

Por, çfarë po ndodh?

13 tetorit i ka kaluar çdo afat ligjor. Askush nuk është regjistruar. Pra, kjo datë ka rënë. Ndoshta ajo mund të jetë përafërsisht dhe mund të përkojë me 20 gushtin e mbarimit të mandatit të Voltana Ademit, por nuk ka më afate për t?u regjistruar.

Çka do të thotë se presidentit i duhet, në bazë të ligjit, që të shpallë zgjedhjet e parakohshme lokale në Shkodër.

Ilir Meta në fakt nuk i njeh zgjedhjet e 30 qershorit, megjithëse është rasti unik në botë, ku një president dekreton një palë zgjedhje, më pas ato zhvillohen dhe ai nuk i njeh sepse kishte ndërruar mendje 10 ditë më parë dhe kishte ofruar një datë tjetër. Gjë që në fakt jo vetëm nuk e zgjidhi, por e thelloi krizën.

Tashmë duket se gjithçka është në dorë të Ilir Metës, për të parë se nëse është politikani që zgjidh apo që fut vendin në kriza ciklike.

Pra, a do të dalë Ilir Meta me një dekret të ri për t?i dhënë zgjidhje situatës në Shkodër, duke dekretuar një datë për zgjedhje të parakohshme, e cila do të çonte në një fushatë elektorale vetëm për këtë bashki, ku dhe do të zgjidhej kryebashkiaku i ri.

Në çdo rast me futjen e PD-së, fitorja e Shkodrës është në tavolinë. Por, përtej kësaj duhet data dhe duhet presidenti. Megjithëse mund të ndodhë që Basha të vijojë çmendurinë e tij për të mos hyrë në zgjedhje dhe duke ia lënë sërish Edi Ramës këtë bashki.

Por, sytë dhe veshët janë nga presidenti. Njeriu i cili zgjohet në mëngjes me statuse, bën foto me qen, me tifozë, ngjitet nëpër male dhe pritet të na tregojë se çfarë do të bëjë. Do të jetë njeriu i krizës, pra do ta thellojë më tej atë, do të nxisë përplasjen, duke pritur në zyrën e Presidencës edhe shkarkimin e tij, apo do t?i japë zgjidhje krizës duke e bërë Shkodrën një shembull, që përtej një qyteti përplasje të ishte qyteti që do të zgjidhte krizën politike në vend dhe sytë e shqiptarëve do të ishin nga e ardhmja, jo nga përplasja e radhës e Ramës me Bashën, ku nga pas qëndron dhe Ilir Meta?!/ CNA.al