web counter
LEXO PA REKLAMA!

SHKARKO APP

App Store
Google Play

Foto-“Zhduket” magjia e Syrit të Kaltër/ Një monument natyre i lënë në harresë

25 Korrik 2019, 09:21, Aktualitet CNA

Syri i Kaltër është një vend turistik, ndër më përrallorët që ka vendi ynë.

Syri i kaltër, një bukuri magjike, për të cilën kanë shkruar edhe mediat huaja ndodhet në fshatin Muzinë të Rrethit të Delvinës, pranë rrugës nacionale Delvinë-Gjirokastër.

Është një pikë shumë piktoreske, ku nga një burim i kaltër me origjinë karstike nga Mali i Gjerë del një ujë i kristaltë.

Syri i Kaltër është shpallur monument natyre. Forma e tij është ovale e ngjashme me formën e një syri, shpërthen nga toka, i errët në mes dhe i kaltër anash.

Duke qenë se është kandidat për Trashëgimi të Unesco, por jo vetëm për këtë arsye, Syri i Kaltër pretendohet që të ketë edhe përkujdesjen shtetërore.

Por, çfarë ndodh?

Edhe pse një monument kulture, që duhet të kishte vëmendjen maksimale të institucioneve shtetërore, Syri i Kaltër ka ngelur jetim.

Për të shkuar për të vizituar këtë vend magjik, këtë pasuri të vendit tonë, duhet të përshkosh një rrugë e cila ndodhet në gjendje katasrofale.

Për të bërë një kilometër rrugë duhet të paguash 1 mijë lek për makinën dhe 500 lek për çdo person.

Për më tepër, sikurse shikohet edhe nga fotot e siguruara nga CNA.al, rruga për të shkuar tek Syri i Kaltër është në gjendje të mjerueshme, është me gropa dhe e shkatërruar. Gjithçka që shikon, është vetëm pluhur.

Rrugë që ndoshta as në zonat më të thella të Shqipërisë nuk i gjen në atë gjendje.

Nuk dihet se kush e ka përgjegjësinë, Ministtria e Turizmit, ministria e Kulturës apo e ka Bashkia Finiq, por kjo nuk ka rëndësi. Fakti është se zona është e keqadministruar, vendi është i papastruar, Syri i Kalër është i rrethuar nga kioska që shesin suvenire.

Gjithçka duket të jetë një katastrofë e vërtetë. Duke ?zhdukur? edhe atë magji që ka vetë Syri i Kaltër.

Nuk ka rëndësi cili institucion e ka përgjegjësinë, por shteti në këtë rast një pasuri të tillë e ka braktisur dhe nuk e shfrytëzon./ CNA.al

 





Lajmet e fundit nga