Hajdarmataj, Prela dhe Imeraj, në errësirën e KLP/ SPAK i dyshimtë me prokurorë gjobaxhinj?

14 Korrik 2019, 10:09, Aktualitet CNA

Të premten që shkoi, Këshilli i Lartë i Prokurorisë, ka përfunduar intervistat me kandidatët për SPAK.

Përgjatë pesë ditëve, 22 kandidatët dolën para KLP, për t’u intervistuar në lidhje me të kaluarën profesionale, si dosjet hetimore që kanë pasur në duar dhe jo vetë.

Procesi i intervistimit ka kaluar në errësirë për pjesën më të madhe të kandidatëve, vetëm për katër kandidatët Dritan Prençi, Ndini Tavani, Vladimir Mara dhe Maksim Sota, KLP është kujtuar të bëjë trasnparencë për mediat. Jemi njoftuar në kohë rekord, gjatë të premtes që shkoi, për pyetjet dhe përgjigjet.

Sa u përket të tjerëve edhe pse ka qenë interesimi i madh i mediave, KLP ka heshtur, duke vepruar kështu me dy standarte.

Në fakt, nga një KLP me përbërje të kontestuar pritet më shumë se kaq.

Në këto rrethana pritet që këtë javë, të bëhen publik dhe kandidatët favorit, sipas pikëzimit që do të marrin nga KLP.

Pëveç kësaj procedure për të qenë pjesë e SPAK-ut, kandidatët duhet të kenë kaluar Vettingun në dy shkallët.

Ndërkohë, nga 22 kandidatët që janë intervistuar, 12 prej tyre nuk kanë kaluar ende në procesin e Vettingut në shkallën e parë.

Besim Hajdarmataj, Anton Martini, Anita Jella, Altin Dumani, Doloreza Musabelliu, Dorina Bejko, Elida Kaçkini, Elisabeta Imeraj, Enkeleda Xhengo, Klodjan Braho, Ndini Tavani dhe Maksim Sota, nuk janë futur ende në Vetting, ndërsa dy kandidatë të të tjerë Besnik Muçi dhe Donika Prela, janë ankimuar nga Komisioneri Publik, dhe do të jetë Kolegji i Posaçëm i Apelimit që do të vendos.

Deri më sot, kjo është situata, pasi gjithçka mund të ndryshojë qoftë në KPK, apo në KPA, pas ankimimit të Komisionerit Publik.

Duke qenë se këtë javë, pritet lista e favoritëve për SPAK, CNA.al, kërkoi informacione nga Komisioni i Pavarur i Kualifikimit se çfarë po ndodh me kandidatët që duhej të kishin prioritet dhe pse jemi sot në një situatë të tillë.

“Dëshirojmë t?ju sigurojmë se trupat gjykuese, në bashkëpunim me stafin ndihmës po punojnë me seriozitet, madje dhe jashtë orarit zyrtar për të përmbyllur procedurat e rivlerësimit për të gjithë ato subjekte që konsiderohen prioritarë, përfshirë këtu edhe kandidatët për Strukturën e Posaçme Antikorrupsion (SPAK). Komisioni e ka të qartë rëndësinë e ngritjes së këtij institucioni dhe është tejet i angazhuar për të kryer procesin e rivlerësimit për këdo subjekt me shumë rigorozitet, por nga ana tjeter ecuria e punës së një dosje varet nga kompleksiteti i saj”, thuhet në përgjigjen e KPK-së, për CNA.al.

Sipas tyre, nga ana e Komisionit, nuk ka asnjë zvarritje të procesit, por rivlerësimi kalimtar, që të kryhet i plotë dhe në zbatim të Kushtetutës dhe ligjit kërkon kohën e vet.

Më tej KPK pa dhënë ndonjë afat konkret ka deklaruar se 12 kandidatët për SPAK, do të ftohen në seancë dëgjimore menjëherë sapo të ketë përfunduar puna për secilën dosje nga trupat gjykuese.

Nga ecuria e këtij procesi, s’ bëhet fjalë që të kemi SPAK, në shtator, thjesht duket se edhe njerëzve të drejtësisë, por edhe atyre të politikës, po iu pëlqen si retorikë, pasi ngritja e strukturës duket ende larg.

Të ketë prapaskena, pazare, kjo nuk është ndonjë gjë e re. Kandidatë për SPAK, na qenkan ankuar në KLP, se kërcënuar në punën e tyre nga politika dhe jo vetëm.

Nëse s’ishin të zotë për të bërë detyrën e prokurorit, të largoheshin, nuk i ka dërguar askush me zor nëpër prokurori. Apo, luksi nuk mund të justifikohet ndryshe?!

Ne do të shkruajmë ditët në vijim për prokurorë (e) gjobaxhinj, që duan të jenë pjesë e SPAK-ut. Kur bëhet fjalë për 1milion euro edhe mund të jetë tunduar, por të paktën të kishte bërë si kolegët të ishte larguar nga sistemi i drejtësisë./CNA.al