Kriza politike/ Alfred Moisiu apel të fortë Ramës dhe Bashës

26 Qershor 2019, 09:28, Aktualitet CNA

Ish-presidenti Alfred Moisiu, ka folur sot për mediat lidhur me krizën politike në vend duke i bërë thirrje kryeministrit Edi Rama dhe kreut të PD, Lulzim Basha për të reflektuar dhe për të gjetur një zgjidhje me afat të gjatë lidhur me krizën politike në vend, e cila, sipas Moisiut, përsëritet vazhdimisht

Së bashku me ish-presidentin kanë qenë të pranishëm edhe disa intelektualë, përfaqësues të medias, shoqërisë civile dhe biznesit, ku kanë kërkuar një pakt kombëtar dhe një zgjidhje për situatën në interes të Shqipërisë e jo në kurriz të saj.

Ish-presidenti dënoi retorikën e dhunës dhe retorikën që përçan shqiptarët me njëri-tjetrin duke krijuar edhe një imazh negatin të Shqipërisë në arenën ndërkombëtare.

Moisiu u ndal edhe te integrimi i Shqipërisë në BE duke thënë se koha e mbetur deri në tetor ësthë kohë shumë e shkurtër për të bindur skeptikët që të mund të hapen negociatat, ndërsa shtoi se ka ende shumë punë për të bërë nga ana jonë që të mund të plotësojmë kushtet që kërkon Europa.

?Ministrat e Jashtëm të Këshillit të BE vendosën për të shtyrë në muajin tetor vendimin për mundësinë e hapjes së negociatave me Shqipërinë. Hapja e negociatave me BE është prioritet absolut kombëtar për vendin tonë. Në shtyrjen e tyre ka ndikuar hezitimi i disa vendeve anëtare dhe kriza politike në vend. Hapja e negociatave, në vend se të kuptohet si një çështje mes BE dhe vendit, po përdoret si instrument i luftës politike mes shumicës e pakicës. Koha deri në tetor është e shkurtër për të bindur vendet skeptike. Punët për t?u kryer nuk janë të pakta. Kriza po përkeqësohet. Është koha për një zgjidhje në interes të Shqipërisë dhe jo në kurriz të saj. Koha për një zgjidhje afatgjatë për të mos u përsëritur krizat ciklike. Janë të patolerueshme nxitja e urrejtjes mes shqiptarëve për interesa partiake; veprimet e dhunshme ndaj institucioneve; përdorimi i shprehjeve luftënxitëse e përçarëse; retorika denigruese ndaj rivalëve dhe ndaj secilës palë politike; mungesa e dialogut. Këta faktorë kanë çuar në cenim të sigurisë së qytetarëve, dëmtojnë demokracinë e brishtë shqiptare, po cenojnë imazhin e Shqipërisë në botë. Veprime që bien ndesh me dëshirat e popullit për integrimin europian.

Ata kanë vendosur interesat personale dhe partiake mbi interesat e vendit. Ne vlerësojmë se kjo situatë duhet të marrë fund përmes një reflektimi të thellë dhe mbi këtë bazë i drejtohem cilitdo që ka një zë në vendimmarrjen politike që të fokusohet në çështje me interes të përgjithshëm kombëtar.? Tha ndër të tjera Moisiu./CNA.al