U rikthye pas 10 vitesh emigrim/ Ja përse Durrësi duhet të votojë Valbona Sakollarin

23 Maj 2019, 08:08, Aktualitet CNA

Valbona Sakollari është kandidatja e Bindjes Demokratike, në garën për të marrë drejtimin e Bashkisë së Durrësit.

E ftuar në emisionin ?Këndvështrim? në AdriaNet, Sakollari, tha se është një vajzë durrsake, e cila ka mbaruar studimet e larta në Universitetin e Tiranës, Fakulteti Ekonomik, Dega Ekonomiks, në vitin 1996.

Gjithashtu ajo deklaroi se ka një Master Shkencor në Politika dhe Administrim dhe jam në proces të regjistrimit për doktoraturë në një Universitet të Bashkimit Europian.

Valbona Sakollari në vitin 1996, me të mbaruar studimet, emigroi në Itali për 10 vite, ndërsa në vitin 2006 vendosi të kthehet në Shqipëri.

E pyetur se pse vendosi të kthehet në Shqipëri, Sakollari tha se ?Ndoshta në një moment kur njerëzit e kishin fokusin jashte Shqipërisë, vazhdojnë ta kenë në fakt dhe kjo është një nga problematikat që ka Shqipëria sot por që vendosëm të ktheheshim dhe ta ndërtonim të ardhmen tonë këtu. Të ardhmen tonë dhe të ardhmen e fëmijëve tanë. U punësova si ekonomiste në një kompani ndërkombëtare që sot është një kompani lider në nivel botëror në sektorin ku ajo operon, dhe tani jam drejtuese e kësaj kompanie. Gjithashtu paralelisht jam lektore në Universitetin ?Aleksander Moisiu? në Durrës, Departamenti i Administrimit Publik, pra Fakulteti i Shkencave Juridike Politike dhe fusha e mësimdhënies është kryesisht Politika Ekonomike, Ekonomi e Aplikuar, Menaxhim etj. Jam nënë e 3 femijeve, kjo është Valbona.?.

Më tej, ai dha edhe arsyet e forta se pse është kandidatja e duhur për të marrë drejtimin e Bashkisë së Durrësit.

?Siç thashë kam vendosur të ndërtoj të ardhmen time dhe të fëmijëve të mi në Durrës. Durrësi për mua është fokusi i gjithçkaje. Në fakt unë kam hyrë në këtë garë me përgjegjësi dhe me përgjegjshmëri të plotë për sfidën e madhe që marr përsipër, por kam hyrë me moton që partia ime është Durrësi. Dhe BINDJA DEMOKRATIKE në fakt është një mjet, një instrument për ta arritur qëllimin tim. Durrësi ka patur përparime në kohë le të themi dhe këtë nuk mund ta mohojmë. Por shpesh ky zhvillim ka qenë i amullt, i ngadaltë, jo i mirëmenaxhuar duke akumuluar dhe duke krijuar problematika. Pra ka një ngërç, ka diçka që nuk funksionon dhe mendoj që pikërisht mendoj që profili im në këtë moment, mendoj se është momenti i duhur, përshtatet me atë nevojën për të ndryshuar dhe për t?i dhënë Durrësit një profil të ri, një propozim të ri, të ndryshëm nga çka qenë.?-tha Valbona Sakollari.

Po ashtu ajo tha se “Bindjet e mia janë të djathta qysh në gjenezë le të themi, që në kohën që unë kam qenë gjimnaziste apo edhe më pas studente, që ishin vitet 1991-92. Ndryshimi i sistemit na përfshiu dhe na bëri pjesë të së djathtës. Pjesëmarrja ime gjatë gjithë kësaj kohe në biznesin privat apo në kompani private, e orientuar drejt ekonomisë së tregut, ka të bëjë me bindjet e mia të djathta. Po të kisha dashur të isha pjesë e politikës mund ta kisha bërë edhe më përpara.”

Sakollari theksoi se “gara ime dhe sfida ime nuk i drejtohet kandidates tjetër. Unë e bëj garën me sistemin, siç thashë ky sistem që ne jemi tashmë”./ CNA.al

Zbulimi i Bindjes në Durrës/ Kush është Valbona Sakollari