Përplasje në KQZ/ Biba-Kasos: E rëndë, na shantazhove

23 Maj 2019, 09:57, Aktualitet CNA

Komisioni Qendror i Zgjedhjeve po zhvillon sot një mbledhje në kuadër të zgjedhjeve të 30 qershorit, ndërsa ka patur debate në lidhje me kërkesën e opozitës joparlamentare, PD-së dhe LSI-së, për të pasur komisionerë në zgjedhjet e 30 qershorit, edhe pse ato i kanë bojkotuar zgjedhjet dhe nuk kanë asnjë kandidat për kryetar bashkie.

Përfaqësuesi i PD-së, Ilvi Kaso ka thënë se është e drejta e tij ligjore për të pasur komisionerë. Ai tha në mbledhjen e KQZ, se në procesin zgjedhor ka shkelje të mëdha ligjore, që sipas tij lidhen me regjistrimin e kandidatëve të tjerë, siç janë të Bindjes Demokratike të Astrit Patozit.

Përfaqësuesi i PD ka thënë ndër të tjera se anëtarët KQZ janë kërcënuar për të mos pranuar regjistrimin e komisionerëve duke shtuar se nëse do të ketë ndonjë vendimmarrje kundër pranimit të komisionerëve, atëherë do të përballen me përgjegjësi penale.

Anëtari i KQZ-së Denar Biba e ka quajtur shantazh këtë deklaratë të Kasos.

“Opozitë fasadë për të zëvendësuar opozitën e vërtetë. Është një proces zgjedhor i mbushur me paligjshmëri, që në më shumë se gjysmën e bashkive ofron një kandidaturë të vetme. Eksponentë të mazhorancës kanë kërcënuar Komisionin Qendror të Zgjedhjeve që të mos regjistrojë komisionerët tanë. Anëtarët e KQZ të mos bien pre e presioneve. Ju paralajmëroj se nëse nuk udhëhiqeni nga ligji, do të ballafaqohet me forcën e ligjit dhe me përgjegjësi penale në rast të shpërdorimit të detyrës. Ligji është i qartë dhe nuk mund të bëhet objekt debati”, tha Ivi Kaso sipas raportimit të Report Tv.

“Na shantazhove. Ishte shume e rëndë dhe e ulët. Është hera e parë”, ka thënë Biba duke iu drejtuar Ilvi Kasos.

Kaso ka përsëritur edhe njëherë se komisionerët i duan që të mos lejojnë shkelje ligjore nga ana e mazhorancës.

? 30 ditë përpara zgjedhjeve kemi të drejtë të plotësojmë vakancat. Duhet të monitorojmë procesin zgjedhor. Ka ankesa e denoncime. KZAZ janë të mbushura me paligjshmëri, me qëllim të qartë të partisë shtet, e cila dhe e vetme në garë shkel afatet e deri tek emërimi i një opozite fasadë. Krijojnë përshtypjen sikur do të ketë zgjedhje. Ky kryeministër nuk garanton dot zgjedhje as kur garon e vetme. Ne po ushtrojmë një të drejtë ligjore për komisionerët.? tha ndër të tjera Kaso.

Eridjan Salianji, përfaqësuesi ligjor i PS: I do për të bërë detyrën, apo si vëzhgues?

Kaso: Duam anëtarë në KZAZ, kjo është e qartë. Kandidaturat tona janë serioze. Me eksperiencë të mëparshme zgjedhore

Salianji: Procesi zgjedhor ka afate. Që të jesh subjekt zgjedhor duhet të jesh regjistruar. Pastaj të lindin të drejtat për marrjen pjesë në proces.

Kaso: Komisionerët përcaktohen përpara se partitë të regjistrohen në zgjedhje

Kujtojmë se PD dhe LSI kanë ndërruar mendje në momentin e fundit dhe kanë vendosur që të dorëzojnë emrat për anëtarë në KZAZ duke e justifikuar këtë veprim me shpjegimin se janë vënë re shkelje nga ana e mazhorancës dhe në këto kushte opozita joparlamentare kërkon që të dokumentojë këto shkelje.