Leksioni që Korça i dha Lulzim Bashës

9 Maj 2019, 10:51, Aktualitet CNA

Ka gati 6 vite në krye të PD-së dhe Lulzim Basha ende nuk po e kupton se dega e Korçës është e përçarë, në konflikt dhe thuajse e shpartalluar.

Nën drejtimin e njeriut të prerferuar të Lulit, kreut të degës Andrea Mano, një ish-ortak i Niko Peleshit, zv/kryeministri i Edi Ramës, dega e PD-së së Korçës, vazhdon të rrudhet.

Leksionin Korça ja dha dje, kur dega nuk mundi të organizonte takim në pallatin e sportit, por e quajti aktiv takimin dhe u mbyll në një sallë me 200 vende. Aktivi i degës së Korçës në fakt do tre salla kinemash, por përtej kësaj, dega nuk zhvilloi aktivitet në pallatin e sportit nga frika se nuk e mbushte dot dhe u mbyll në sallw kinemaje.

Shkodra quhet sukses në pallat sporti, ndërsa në Korçë dega mbyllet si në vrimën e miut. Për show disa dhjetra makina nga Bashkia Devoll që drejtohet prej PD-së, pritën Lulzim Bashën, por thjesht dhe vetëm kaq.

Në asnjë rast që nga dita që PD drejtohet nga Andrea Mano, në asnjë rast që kur drejtimin e ka marrë Lulzim Basha, PD nuk ka zhvilluar një takim elektoral në pallatin e sportit, pa folur pastaj për mitingje në sheshe, gjithmonë në një pozicion te ushtari i panjohur, ku i gjithë qarku mbledh maksimalisht një mijë veta.

Faktet për mungesën e mbështetjes dhe shpartallimin e degës së Korçës kanë me vete edhe rezultatet elektorale.

Viti më i keq elektoral i PD është viti 1997, se 2013 ka shumë herë më tepër vota. Në fakt në dy palë zgjedhjet e fundit me Lulin dhe Manon kryetarë, në 2015 dhe 2017 dega e Korçës, që përfshin Bashkinë Korcë, pra qytetin dhe disa ish-komuna, ka rezultatin më të dobët në 30 vite.

Janë vetëm 14 mijë vota në Bashkinë e re, e cila ka edhe 7 komuna si Drenovë, Mollaj, Qëndër Bulgarec, Voskop, Vithkuq, Lekas dhe Voskopojë.

Janë përgjysmuar votat në krahasim me vitin 2013. PD vërtitet tek 30% i votave, kur degës i janë shtuar disa komuna bastione ku fitonte me diferenca 600 apo 1500 vota.

Dje ishte leksion i hapur dhe i përsëritur për Lulzim Bashën, që vazhdon të ngulë këmbe në një kryetar të paaftë për degën e Korçës, i jep asaj si simbol Ervin Salianjin pa asnjë lidhje me qytetarinë korçare, apo u shpall hero çunin e Fahriut nga Mokra e Pogradecit.

Problemi i Lulit është realisht i prekshëm në Korçë dhe duket qartë, por Basha nuk do ta shikojë, dhe nuk do të ndryshojë.

Kështu siç po shkon dhe me zgjedhje të parakohshme, në Korçë Lulzim Basha nuk shkon dot më shumë se 30 apo 35% dhe kjo si votë kundër Ramës, sepse dega e PD në Korçë është faktikisht e shpartalluar dhe totalisht inegzistente, pa folur për pazaret me dyshen Peleshi ? Filo, që faktikisht janë kryetarët realë të PD në Korçë./ CNA.al

Luli dhe realiteti/ Në Shkodër në pallat sporti, në Korçë në sallën e kinemasë

Skandali përsëritet në Korçë/ Ish-deputetja braktis Bashën