Kandidati i djathtë/ Përballja me Veliajn, kryengritje kundër politikanëve plaçkëbërës

6 Maj 2019, 18:12, Aktualitet CNA

Tashmë e ka bërë fakt të kryer vendosjen e kandidaturës për Kryebashkiak të kryeqytetit, dhe përballjen me “rilindasin” Erion Veliaj, që, po ashtu, e ka konfirmuar rikandidimin.

Veliaj si përfaqësues i të majtës, kurse Arian Galdini, kryetar i partisë LDE, si kandidat i të djathtës. Në braktisje të garës nga PD dhe koalicioni opozitar i këtij spektri, duke mos qenë dakort me këtë aksion pa bereqet të të djathtës, Galdini ka pranuar të sfidojë Veliajn, jo thjesht e vetëm se ai është i majtë, por se me politikat e ndërmarra gjatë këtyre viteve të ikura e ka “lalifikuar Tiranën, e ka kthyer kryeqytetin në peng të mafias rajonale”, sikurse e ka përkufizuar Galdini. I cili në një mesazh të fundit në faqen e vet në rrjetet sociale e ka zgjeruar më tej rrethin e sfidës kur është shprehur:” Kandidimi im përballë Erion Veliajt është si një lloj kryengritjeje kundër gjithë politikanëve plaçkbërës”. Por për ta realizuar këtë i duhet sërish ndihmë, nga të gjithë,nga ata që janë të djathtë, por edhe të qenët kundër politikës së “lalifikimit” të Tiranës…

“Miq të LDE në Tiranë! Jam i prekur dhe plot emocion nga kaq shumë qytetarë që më kanë kontaktuar dje dhe sot për të më ofruar ndihmën dhe mbështetjen e tyre vullnetare për mbledhjen e firmave të nevojshme që unë të jem kandidati i djathtë opozitar për Kryetar Bashkie në Tiranë. Mirënjohje pafund! Jemi partia me zero para dhe zero media”,- e nis mesazhin e tij më të fundit Arian Galdini, duke vijuar:

“Jemi partia e qytetarëve të papërlyer. Ajo që konstatoj e vërej unë këto dy ditë, është e vërteta e hidhur se askush nga Establishmenti Politik Aktual nuk e do kandidimin tim për Kryetar Bashkie, askush.

Deri tani asnjë mbështetje prej asnjë aktori e faktori politik aktual. Le të shpresojmë në ditët në vijim. Ftesën time e kanë të hapur dhe publike. Negociata e biseda private, pa prononcim publik nuk bëj me asnjë. E kam ndarë mendjen që ose kandidoj si qytetar me mbështetje të hapur, të ndershme dhe transparente, ose kurrë mos kandidofsha.

Por e vërteta e madhe dhe shpresëdhënëse është se shumë qytetarë krejt të panjohur për mua më kanë shkruar dhe më kanë ofruar ndihmën dhe mbështetjen e tyre vullnetare dhe të pakushtëzuar. Kandidimi im për Tiranën, dua që të jetë një lëvizje e vërtetë qytetare, një kryengritje vullnetesh qytetare kundër këtyre Elitave Plaçkëbërëse qê e kanë sunduar barbarisht e pa pikën e mëshirës vendin tonë.

Nuk ka fuqi që e ndal dot kryengritjen e vullneteve të qytetarëve të papërlyer. Duhen shumë shumë firma. Mijëra firma dhe fotokopja e kartës së identitetit për çdo firmëtar.

Kemi më pak se 1 javë në dispozicion. Kam nevojë për ndihmën e çdo qytetari të ndershëm që të mbledhim firmat e domosdoshme që kërkohen nga Kodi Elektoral. Çdo firmë e çdo ndihmë është tejet e vyer.

Dua të jem Kandidati i Qytetarëve. Vetëm me ndihmën tuaj mund tia dalim mbanë. Kush ka dëshirë e mundësi për të na ndihmuar e mbështetur, ju lutem më kontaktoni: E-mail: [email protected] Cel: 0672051564 Provën dhe sprovën e mbledhjes së firmave do ta bëjmë deri në fund. Dashtë Zoti ia dalim! Faleminderit nga zemra! Të gjithëve faleminderit!”/ CNA.al