Nga Mero Baze/ Dalldia patriotike e “kolabracionistit” Idrizi

4 Maj 2019, 19:22, Aktualitet CNA

Pashë një reagim të Partisë së Shpëtim Idrizit mbi tabelat dygjuhëshe në zonat e pakicës greke në Jug të Shqipërisë. Duke marrë shkas prej tyre, reagimi i Idrizit, shkonte deri në fillim të shekullit të shkuar duke kujtuar Zografin e vitit 1914, duke e krahasuar atë me Edi Ramën, dhe plot patetizma të tjera, që duket se kanë nevojë ti kompesojnë kësaj partie mungesën e koherencës që ka vet, në raport me forcat ekstremiste të politikës greke në Tiranë.

Së pari për gjithë këta patriotët që karikohen me bateri, tabelat dygjuhëshe në zonat e pakicës janë detyrim dhe jo poshtërim i shtetit shqiptar. Një shtet që aspiron të hyj në Bashkimin Evropian, nuk mund ti mohoj një pakice të ketë tabela rrugore në gjuhën e vet, ndërkohë që është detyrim që në zonat kufitare dhe aty ku nuk ka pakica, të ketë tabela edhe në gjuhën angleze për të huajtë që vizitojnë Shqipërinë.

Ndaj ky debat nuk ja vlen të bëhet, nëse nuk do të më tërhiqte vemendjen hipokrizia e Shpëtim Idrizit. Si përfaqësues politik i një komuniteti që ka vuajtur nga një genocid me bazë etnike në Greqi, dhe është zbuar andej me dhunë, Shpëtim Idrizi së pari nuk duhet të predikoj urrejtje etnike, pasi ai nuk është në krye të një partie politike për të nxitur urrejtje ndaj grekëve të Shqipërisë, por për të kërkuar të drejtat e mohuara të shqiptarëve të Greqisë, në këtë rast të komunitetit çam. Nuk mund të pretendosh të rehabilitosh një komunitet të masakruar nga dhuna etnike, duke nxitur dhunën etnike, pasi kështu thjeshtë je duke imituar Napolon Zervën në versionin shqiptar.

Por kjo është gjysma e së keqes. Hipokizia bëhet e plot kur po ky patriot me bateri, ka disa javë që rri si langaraq tek dera e Lulzim Bashës, me shpresë mos e fut dhe atë në ?qeverinë hije? tranzitore, nëse e lejon Vangjel Dulja. Dhe Basha as e zbon, e as e mban, por thjesht e lë tek dera që të mos i shqetësohet Vangjel Dulja.

Në fakt çifti Idrizi -Dule, janë çifti më regresiv në politikën shqiptare, pasi janë dy politikanë që në thelb punojnë kundër interesave të komuniteteve që përfaqësojnë. Vangjel Dulja përfaqëson politikisht pakicën greke, por del deputet me votat e shqiptarëve çam në Vlorë, pasi grekët nuk e votojnë . Dhe arsyeja është se ai përfaqëson më shumë ?Agimin e Artë?, se interesat e politikës greke apo pakicës greke në Shqipëri. Ai më shumë përpiqet të mbjellë urrejtje për çamët, se sa të merret me të drejtat e grekëve në Shqipëri .

Në të njëjtin kurth ka rënë dhe Shpëtim Idrizi. Dhe ky më shumë merret me luftën kundër pakicës greke në Shqipëri, se sa me te drejtat e mohura të çamëve në Greqi. Dhe për ironi të fatit, të dy rrijnë në një tryezë me Lulzim Bashën , por Dulja në krye të vendit, kurse Idrizi vetëm kur Lulzimit i jep leja Dulja, ta pranojë.

Ndaj para se të akuzoj qeverinë shqiptare për kolabracionizëm me qeverinë greke, në këtë rast për një të drejtë elementare të pakicës greke në Shqipëri, është më mirë të sqaroj çamët, se çfarë e detyron të poshtëroj partinë e tyre, duke qëndruar tek dera e SHQUP-it, mos ja hap Vangjel Dulja. Ky është më keq se kolabracionizëm. Është poshtërim, në përpjekje për t?iu lutur ?Agimit të Artë? të Greqisë me degë në Tiranë, të të pranoj në tryezë për aleatë.