"Meta të dalë para drejtësisë"/ Basha hesht akuzat për vrasje deputetësh

1 Maj 2019, 13:50, Aktualitet CNA

Kriza politike, po cënon të ardhmen e qytetarëve, pasi kontribuesit e kësaj krize, kanë zgjidhje për veten e tyre. Ata sa shahen, fyhen dhe diku më tej puthen e përqafohen me njëri tjetrin, aq sa duket se disa të ashtuquajtur politikanë, kanë dy personalitete.

Është e vërtetë që politika s’ njeh moral, por kreu i PD-së Lulzim Basha duket se ka shkuar edhe më tej.

Nëpërmjet rubrikës “Dje dhe Sot”, CNA.al do të risjellë në vëmendje, akuzat që dikur Lulzim Basha lëshonte pa doganë ndaj Presidentit Ilir Meta.

Ndërsa sot është gati të pështyjë atë që ka lëpirë dhe të bëhet bashkë me Ilir Metën për të ardhur në pushtet.

Gjatë fushatës zgjedhore për lokalet e 2015-së, Vora ishte shndërruar në një nga vatrat më të nxheta të përplasjes mes PD dhe LSI.

Gjatë një tubimi elektoral në Vorë, Basha ka sulmuar ashpër Ilir Metën, i cili sipas tij kërkonte ta shndërronte Vorën në çifligun e tij.

“E do patjetër, e do që të jetë këtu dy herë në ditë kur të ikë nga Gjiri i Lalzit dhe kur të vijë nga Gjiri i Lalzit. Po Vora nuk është kafeneja e Ilir Metës. Vora nuk është kavalishenca e Ilir Metës. Askush nuk ka të drejtë të vendosë me dhunën e krimit dhe krimin e dhunshëm”, ka deklaruar Basha nga Vora.

Po në vitin 2015, Lulzim Basha i kërkoi Ilir Metës, që në atë kohë ishte kryetar i Kuvendit që të jepte dorëheqjen dhe të përballej me drejtësinë për akuzat që Tom Doshi i kishte bërë si urdhërues i vrasjes së tij dhe të deputetit të PD-së Mhill Fufi.

Më vonë në vitin 2016, kreu i PD e quante Ilir Metën shkelës serial të Kushtetutës.

“Nuk kam kërkuar dorëheqjen e Ilir Metës si kryetar i Kuvendit. Kam kërkuar dhe kërkoj dorëheqjen për akuzat që janë bërë në kohën kur ishte zv. Ministër i Jashtëm si personi që qëndron prapa kompanisë DIA dhe këto akuza si kam bërë unë por avokatët e qeverisë”, ka deklaruar Basha para mediave në vitin 2016

Ndërsa në vitin zgjedhor të 2017, kreu i PD nga Shkodra, përveç kryeministrit Edi Rama, do të akuzonte rëndë edhe Ilir Metën.

Në një takim me mbështetës në Shkodër ai akuzoi Edi Ramën dhe Ilir Metën për premtimet e pambajtura.

“Me 25 Qershor ti japim fund Republikës së politikanëve, që kanë shkelur premtimet, që kanë mashtruar popullin, që kanë korruptuar shtetin, që kanë inkriminuar institucionet, që kanë mbushur Shqipërinë me drogë, q ëi kanë nxjerrë shqiptarët dhe njëherë në eksod drejt azilit. Pra fundi i republikës së një grushti njerëzish që i kanë shërbyer vetëm vetes së tyre. me në krye Edi Ramën dhe Ilir Metën”, ka thënë Basha nga Shkodra./CNA.al

Meta garant i Kushtetutës apo kriminel?/ Çfarë thoshte dje Lulzim Basha