E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Skandal-Bie siguria në aeroportin e Rinasit/ Fshihen përgjegjësit

9 Prill 2019, 16:20, Aktualitet CNA

Aeroporti Ndërkombëtar i Rinasit nuk ofron siguri as për veten e tij.

Grabitja e përgjakshme e ditës së sotme vërtetoi edhe njëherë se aeroporti i Rinasit, mbetet më i pasigurti në rajon.

Brenda perimetrit të sigurisë së aeroportit, në pistë, persona të maskuar dhe të armatosur deri në dhëmbë janë ngjitur në avion, duke terrorizuar pasagjerët.

Gjithçka ka ndodhur në mes të ditës dhe mes të shtëna të armëve.

Nuk është hera e parë që cënohet siguria në aeroportin e Rinasit, por nuk është as hera e parë që askush nuk ka dhënë përgjegjësi.

Me grabitjen e sotme brenda perimetrit të sigurisë do të thotë që ka rënë siguria e aeroportit. Pra, kushdo mund të vijë dhe të grabisë dhe mund të hyjë lirisht në zonën e sigurisë madje edhe terroristët mund të gjejnë hapësira për të realizuar aktet e tyre, duke rrëmbyer avionë.

Koncesionari që menaxhon Rinasin dhe kompania ICST që menaxhon sigurinë , normalisht deri më tani duhet të kishin dalë me një përgjigje për cënimin e sigurisë në Aeroportin e Rinasit.

Por, deri më tani as kompani që menaxhon sigurinë dhe as Ministri i Brendshëm Sandër Lleshaj nuk kanë reaguar.

Nuk dihet se çfarë presin, kur në aeroportin e vetëm të vendit, jeta e qytetarëve është në rrezik.

Nuk është herë e parë që çalon siguria në aeroportin e Rinasit, nëse kujtojmë ngjarjen e vitit 2016, ku u realizua një grabitje spektakolare në pistë.

Në 30 qershor 2016 u grabitën 990 mijë euro. Grabitësit hynë brenda pistës së aeroportit me një makinë me ngjyrë të kuqe, pa u ndaluar nga askush.

Ashtu siç ka ndodhur edhe sot, ku po mos të kishte qenë në patrullim rastësisht një furgon i Forcave të Ndërhyrjes së Shpejtë, grabitësit do kishin ikur të qetë, pa iu hyrë gjemb në këmbë, bashkë me thasët e parave.

Më herët, fare pranë aeroportit janë regjistruar edhe grabitje të tjera.

Kështu me 2 dhjetor të viti 2015 u grabitën 3 milionë euro nga një bankë e nivelit të dytë. Autorët dolën përpara makinave të policisë private të cilat po transportonin paratë afër aeroportit dhe morën thasët me para.

Ndërsa me datë 09 shkurt të 2017, po pranë aeroportit u grabitën 2 milion e 400 mijë Euro, 200 000 Dollarë amerikanë, 260 000 Paund britanik, 85 000 Franga zviceranë, 30 000 Dollarë australianë dhe 30 000 Dollarë kanadezë. /CNA.al