Si Basha përsërit veten, pas dy vitesh

8 Prill 2019, 09:20, Aktualitet CNA

Lulzim Basha është ekzemplari i politikës shqiptare që vetëm përsërit të njëjtat gabime, përsërit veten e tij dhe vjen rreth e rrotull të njëjtave argumente dhe fakte, pa ecur përpara, pa pasur ide të reja, ç?ka tregon faktikisht se është një politikan i papërgatitur, dhe përtej faktit që vuan kompleksin për të qënë lider, humbet shumë, jo vetëm për veten e tij por edhe nga energjitë që kanë demokratët në këtë situatë politike.

Le të marrim disa fakte të thjeshta. Në vitin 2017, në janar Lulzim Basha thoshte se kandidatët për deputet do të propozoheshin nga baza. Pra, demokratët online do të bënin disa propozime.

Më poshtë po sjellim një link të PD-së dhe një foto të linkut ku t?i mund të propozoje kandidatin tënd.

Atëherë u bënë me dhjetëra-mijëra votime. Shumë njerëz ngritën njerëzit e tyre, mbështetësit e tyre, strukturat e tyre brenda PD-së, që të votonin.

Por, çfarë ndodhi?

Pas protestës së shkurtit, Lulzim Basha hyri në çadër dhe të gjithë kandidatët që u propozuan nga ajo listë u harruan.

Në çadër u promovuan disa fytyra të reja dhe që e gjeten më pas veten në listat, diku fituese, të Lulzim Bashës. Njerëz anonimë, pa asnjë kontribut politik në PD.

Pati edhe nga ata që nuk ishin aspak në çadër dhe natën kur Lulzim Basha dorëzoi listën, pas marrëveshjes me Edi Ramën, lista në disa qarqe u kryesua edhe nga anonimë të tjerë, të cilët kishin paguar qindra-mijëra euro tek familjarët e Lulit për të qënë pjesë e listave të kandidatëve për deputetë.

Kjo tashmë dihet dhe është e pranuar botërisht. Vetë Basha e pranoi se kishte bërë një gabim në ato lista. Lista të cilat u dogji më pas edhe mandatin, pasi iu kishte marrë paratë.

Sot, fiks pas dy vjetësh, Lulzim Basha po përsërit të njëjtën skemë. Por, këtë herë thotë të zgjedhurit tuaj, dhe për këtë po “shet” dy përfaqësues anglezë të konservatorëve, pra një ekip që do të seleksionojë dhe do të bëjë Vettingun e kandidatëve.

Në fakt Vettingu më i mirë i kandidatëve bëhet në bazë, por kjo është diçka tjetër. Ne këtu po flasim sesi Basha vërtitet në të njëjtin vend dhe nuk bën asgjë.

Përtej këtij krahasimi, të rikthimit të së njëjtës çështje të dy viteve më parë, pra të një standardi që nuk e zbatoi kurrë dhe që duket të jetë një gënjeshtër, është edhe vetë organizimi dhe hapja e PD-së.

Që vitin e parë që ka marrë drejtimin e kësaj partie, Basha ka thënë se do të hapë PD-në, partia do të jetë më e madhe dhe zgjedhjet do të delegohen në bazë.

Sot jemi pas gjashtë vitesh. Nuk ka asnjë ndryshim, nuk ka asnjë hapje të PD-së dhe për më tepër ka mbyllje.

Këtë gjë Lulzim Basha e përsëriti vetë në takimin e fundit me studentët, kur tha se do ta hapë edhe më tej PD-në, por ka gjashtë vjet dhe nuk e ka bërë. Pra, përsërit të njëjtat premtime.

Lulzim Basha flet të njëjtën gjë ka thënë edhe në 2017-ën, të njëjtën gjë ka thënë edhe në 2015-ën, asgjë më shumë se kaq.

Lulzim Basha vërtitet në të njëjtin vend dhe në kauzat e tij politike nuk bën gjë tjetër, veçse thotë diçka, kalon pak kohë dhe pastaj kujtohet prap dhe e përsërit.

Aë kthehet sërish te kërkesat e tij të hershme apo idetë e vjetëruara, të cilat i ka lënë në sirtar dhe i nxjerr sa herë i duhen për të thënë diçka në opinion publik.

Lulzim Basha është thjeshtë një politikan jo produktiv, i cili në fakt nuk bën gjë tjetër, thjeshtë dhe vetëm vërtitet në të njëjtat teza dhe të njëjtën çështje që ka thënë më parë./ CNA.al