E fundit!

20:10 Aktualitet

Fjalimet para Kryeministrisë/ Protestuesi: Pushtetarët janë tmerruar, nuk gjejnë vend ku të futen

Pas grumbullimit në qendër të Tiranës dhe vendosjes para g...

Opozitarizmi nuk është "ndërtim pa leje" që legalizohet nga Basha e Kryemadhi

3 Prill 2019, 17:49, Aktualitet CNA

Nga Arian Galdini

– Po sikur atë “u prehshin në paqe” Gramoz Ruçi ta ketë nxjerrë nga thellësia paradoksit të tij, njëlloj si Makbethi kur pyeste: A është gjak ky në lepitkat e mia…?

Po sikur Rudina Hajdari të ketë detyruar me thjeshtësinë dhe pafajësinë e saj Makbeth Ruçin që të dalldiset nga fantazmat e viktimave të tij e të mos dijë nga tu shpëtojë dot?

Pse e paskërka legjitimuar?

Sipas meje e ka lebetitur, e ka tërhequr zvarrë në një “skenë” shekspiriane, ku askush dhe asnjëherë më parë nuk ia ka bërë në 3 dekada që ai zotëri është në atë Kuvend.

Nga foltorja, ku babai i saj ka folur i plagosur ,ajo vajzë e re, nënë e re, politikane e re, ia plasi krejt beftas dhe dlirësisht turinjve të mrrolur që vijnë aq shëmtimisht nga një kohë që duhet harruar për të mbajtur peng një kohë që nuk ia takon, fantazmat e 4 viktimave të 2 Prillit, të cilat, do apo nuk do ai, i qëndrojnë mbi shpinë pikërisht atij, Ministrit të fundit të Brendshëm të Diktaturës Komuniste.

Gramoz Ruçin nuk e futi në Kuvend Rudina Hajdari. Gramoz Ruçin nuk e bëri kryetar Kuvendi, Rudina Hajdari. Gramoz Ruçin deri në dt 16 Shkurt, nuk e ka legjitimuar e nderuar si kryetar Kuvendi, Rudina Hajdari. Pse papritmas u asgjësuaka kujtesa, e Gramoz Ruçi na lindka sot, e na u legjitimuaka nga Rudina Hajdari. Jo or jo. Gramoz Ruçin madje e kanë votuar 4 apo 6 deputetë nga ata që janë tani ish – deputetë të PD.

Gramoz Ruçin e ka legjitimuar e gjithë hierarkia drejtuese e PD në këto 3 dekada që e ka pranuar në çdo Seancë Plenare e çdo negociatë e tryezë dialogu dy apo tre palëshe. Mjaft më me hipokrizi e me gënjeshtra të trasha e sulme të pakuptimta, ndaj një vajze që nuk po bën asnjë krim. Përkundrazi ajo po bën detyrën e saj për të cilën e kanë përfshirë në atë listë ata që e kanë thirrur. Braktisja e detyrës nga Opozita Parlamentare, nuk mund të jetë as kriter vërtetësie e as kriter vlere rezistence apo beteje opozitare.

Opozita zyrtare dhe opozitarizmi janë dy gjëra krejt të ndryshme. Opozita Zyrtare e vendos vetë sesi e kryen apo braktis detyrën e saj. Opozitarizmi nuk është “ndërtim pa leje” që o legalizohet nga Lulzim Basha dhe Monika Kryemadhi, o prishet me ruspa nga Edi Rama dhe Gramoz Ruçi.

Opozitarizmi është mision. Secili ka lirinë e tij/saj dhe detyrimin për ta kryer këtë detyrë në mënyrën më të mirë të mundshme, si e mendon dhe gjykon vetë.

Edhe njëherë, miq dhe vëllezër e motra opozitarë zyrtarë, me strategjinë e rreshtimit shkojmë në luftë por jo në fitore. Nuk mund të luftojmë më shumë njëri – tjetrin, e të mjaftohemi duke i hedhur pak bojë e vezë Edi Ramës. Edi Rama me bojë e vezë mbush tepsinë e tij dhe vetëm i shton gastorizmin natyrës së tij politike si Arlekin.

Thirrja ime është që të gjejmë mënyrën të bashkohemi në vlera, parime e properëndimorizëm. Bashkimi nuk vjen nën tupanë lufte. Bashkimi vjen kur hapen qiejt dhe mendjet për Aleancën e më të mirëve dhe të merituarve.