Redaksionale-Replikë me Dritan Hilën/ Pse Luan Baçi s’mund të jetë Pal Dajçi

10 Mars 2019, 10:58, Aktualitet CNA

Dikush që e njeh historinë politike të demokracisë dhe axhendën e saj të këtyre 30 viteve, nuk do të bënte atë gabim që ka bërë Dritan Hila në një opinion të tij, ku Luan Baçin, kreun e PD Fier e krahason me Pal Dajçin.

Në fakt as në aksion dhe as në stil, apo formim politk s’kanë asnjë lidhje me njëri tjetrin. Jo për të mbrojtur Palin, por për të mos lejuar që në PD figura groteske të kthehen në simbole aksionesh, protestash apo lëvizjesh politike.

E një rast se Dritan Hila nuk e di le ta kujtojë shprehjen e Berishës se me 200 demokratët e Mamurrasit i merrte pushtetin Nanos apo dhe Metës që u kthye në delfin të tij.

Pal Dajçi ishte në krye të tyre në një opozitë të vështirë. PD kishte rënë nga pushteti pas trazirave të vitit 1997, dhuna ndaj demokratëve ishte evidente.

PD luftonte për ekzistencë. Janë me qindra raste arrestimesh, rrahjesh, nga Saranda në Tropojë, jo vetëm nga banda por edhe politika, në të gjitha proceset zgjedhore që pasuan.

Gjithçka u ndal vetëm në vitin 2005, deri atëherë policia dhe shteti i Nanos dhe Metës, vidhnin vota dhe rrihnin demokratë të cilët rezistonin kudo dhe jo vetëm me Palin apo Shaban Meminë që u kthyen në simbolin e njerëzve që qëndronin në krye të protestave apo lëvizjeve opozitare të asaj periudhe që ishin sipas stilit te kohës.

Atëherë Luan Baçi vështirë ta njihte Palin dhe PD-në, se ka qenë pas Petro Koçit apo Koço Kokëdhimës, këtë Dritan Hila duhet ta dijë. Duke qenë se vjen nga një familje thelbësisht e lidhur me diktaturën, le ta pyese shokun Koço Kokëdhima se cila ishte detyra e Luan Baçit në vitin 1991 -92, kur përmbysej diktatura.

Fara e tij si Luan Baçi më shokë ishin instruktore partie dhe ajka e re e komunistëve. Këto nuk e ndalën Luan Baçin që të konvertohej më pas në demokrat dhe të kthehej në një figurë groteske për PD.

Luani është si Luli por edhe më i paaftë, lexo rezultatin e PD në zgjedhjet e 2017 në Fier dhe e kupton sa vlen ai, dhe s’ka asnjë akuzë për manipulim, tjetërsim, blerje apo shitje votash në Fier Qarkun e dytë më të madh në vend.

Po të ishte Pal Dajçi aty ajo nuk ndodhte, por pikërisht PD sot vuan sepse nuk ka disa burra si Pal Dajçi por ka ngel në duar e Luanëve me emër që nuk u bënë dot kurrë të tillë, por ngelën vegla të pështira politike që nuk i ndjekin më pas më shumë se 200 vetë, as sa Pali i thërriste me një fërshëllime për 3 minuta, jo në Mamurras por edhe në Fier, se po të ishin bashkë me Shabanin i kishe më shumë kudo.

Përtej çdo sulmi apo figure të krijuar nga media për Pal Dajçin dhe të tjerë figura të aksionit politk të PD, Hila duhet ta mësojë përfundimisht se në PD ka pasur ca burra, jo vetëm nga aksioni, por nga fjala e respekti, këta që krahason Dritani sot janë një tufë me sharlatanë që po luftojnë të kapin mandatin tjetër për të shpëtuar paratë që e blenë.

Pal Dajçi dhe ca burra të tjerë nuk ikin nga gazi lotsjellës dhe nuk quraviteshin si Luli dhe Luani. Ndaj PD është në këtë gjendje se kanë ikur ata burrat me rr të fortë dhe kanë ardhur ca pa rr hiç.

Sot në PD më trimi duket Muli (Flamur Noka) që Pali as për kafe se pranonte. Muli bën trimin, por ndan hiset me bizneset që i sherbejnë Ramës.

Prandaj PD vuan e vuan. Se burrat që bëjne trimin Rama i ka në sqetull bashkë me klanin e Çilit të UET, listën e kunatit etj etj, si këto që Dritani i di mirë, por edhe emrin s’ia haron dot Palit, por ia krahason me ca pinxho të Republikës së Re.

Ata nuk janë PD-ja, ata janë Lulzimsat që atë parti e kthyen në mall tek tregu çam.

Luan Baçi mund të jetë, Agron Shehaj, çuni Fahriut, Salianji, Grida, Nada Meçorapja, Genc Pollo, Luli vetë dhe kushdo tjetër por Pal Dajçi nuk do mundet kurrë.

/CNA.al

Dokumenti ekskluziv/Ushtari i Kokëdhimës drejton Partinë Demokratike