“Statujat shemben në Shkurt”/ Parlajmërimi i fortë: Nesër shkruhet historia

15 Shkurt 2019, 09:29, Aktualitet CNA

Deputeti i Partisë Demokratike, Luçiano Boçi, ka risjellë në vëmendje sot, disa nga ngjarjet historike për shqiptarët, të ndodhura në muajin shkurt.

Në një postim në rrjetet sociale, deputeti Boçi kujton 20 shkurtin 1991, kur u rrëzua busti i ish-diktatorit Enver Hoxha dhe 17 shkurtin 2008, kur Kosova shpalli Pavarësinë.

Ndërkohë, që na ndajnë vetëm një ditë nga protesta e paralajmëruar me 16 shkurt nga opozita, Boçi paralajmëron se do të jetë dita e lindjes së shpresës, e kthimit të besimit, dhe e ndërtimit të së ardhmes.

?Legjenda shqiptare e Shkurtit e ka një domethënie, e vetë Shkurti për këtë arsye e ka profecinë brenda tij.

Me bekimin e Zotit, sipas legjendës, Marsi ?i luftës?, i mori tre ditë hua Shkurtit, për të përmbushur nga aty zemërimin e tij.
Për këtë ai u shënjua si muaji më i spikatur i vitit.
Ndërsa në vitin 91, me vullnetin e njerëzve të lirë, por dhe me bekimin e Zotit të rikthyer midis tyre, shqiptarët i morën një ditë hua shkurtit, duke e futur atë në histori.

Në datën 20 të tij, ata derdhën zemërimin e tyre rrugëve të Tiranës dhe shkulën e morën zvarrë nga qendra e kryeqytetit, statujën prej bronzi të diktatorit të fundit në Europë, duke i dhënë fund epokës me gjakatare vëllavrasëse dhe regjimit më absurd e duke hapur kështu portat e lirisë.

Në 17 shkurtin e 2008, Zoti e miqtë e shqiptarisë bekuan me pavarësinë e ëndërruar shekullore KOSOVËN. Statuja e dominimit serb u shkërmoq dhe u shbë.

Ndërsa sot, jo rastësisht, qytetarët e këtij vendi, përsëri me bekimin e Zotit dhe me bekimin e familjeve të tyre e fëmijëve të tyre, kanë marrë nga Shkurti vetëm një ditë tjetër hua.
Datën 16.

Vetëm një ditë, për ta kthyer atë në ditën e lindjes së shpresës, në ditën e kthimit të besimit, në ditën e ndërtimit të së ardhmes.?-shkruan Boçi.

Më tej, deputeti demokrat thekson se kjo ditë do ti shërbejë vendit një jetë të tërë.

?Vetëm një ditë, për të shkulur nga rrënjët me soj e sorollop, statujën e gjallë të mashtrimit, arrogancës e harbutërisë së pushtetit të korruptuar e degraduar kokë e këmbë.
Vetëm një ditë, për të shembur njëherë e mirë statujën e krimit, hajdutërisë e babëzisë.
Vetëm një ditë, për të nxjerrë zvarrë nga vrima ku është futur statujën prej kokaine, deliri e çmendurie të një Kryeministri të bojatisur e të marrë fund.
Mos u kurseni në këtë ditë!
Ajo është e historisë dhe e njerëzve të lirë e të ndershëm.
Statujat shemben në Shkurt!?-përfundon postimin e tij, Luçiano Boçi./ CNA.al