Reformë me xhaketat e vjetra/ Dështimi i Ramës me rilindjen e Policisë

23 Janar 2019, 21:24, Aktualitet CNA

Emërimi i Tonin Vocajt si drejtues i Drejtorisë së Krimeve të Rënda dhe Krimit të Organizuar, si edhe ai i Muhamet Rrumbullakut në atë të Shërbimit për Çështjet e Brendshme dhe Ankesat (SHÇBA) ka qenë hapi i parë i reformimit të Policisë së Shtetit. Por edhe fillimi i nisjes së një reforme të paralajmëruar nga ministri i Brendshëm, Sandër Lleshaj, i ardhur nga rradhët e Ushtrisë.

Një nisje që pritet të vijojë me të tjerë emra të qenë drejtues të lartë Policie në kohët e shkuara, kur dikush më shumë e dikush më pak kanë qenë të përfolur si të ngjyer nëpër veprime antiligjore.

Përveç këtyre emërimeve burimet mediatike kanë njoftuar se në ditët vijuese pritet të ketë ndryshime drejtuesish në policitë e qarqeve Tiranë, Durrës dhe Elbasan. Në Durrës mësohet se Lleshaj ka planifikuar të rikthej Ilia Nasin, ndërsa në Tiranë Edmond Rizaj. Që dy këta emra janë të njohur në Policinë e Shtetit, pasi kanë një karrierë të gjatë.

Por, burimet konfidenciale të CNA.al bëjnë me dije se ndryshime do të ketë edhe brenda strukturave të drejtorive ku pritet të lëvizin shefa sektorësh në të tjera qarqe të vendit dhe jo vetëm. Fakti që gjithçka po kryhet pa konkurim por me emërim nuk e përjashton mundësinë që sikurse në emërimet në kupolë edhe nëpër këto sektorë të rikthehen personazhë me të shkuar të spikatur në rradhët e Policisë të viteve të shkuara.

Megjithse të motivuara si ndryshime që do të sjellin rilindjen e Policisë, rikthimi i xhaketave të vjetra, që janë konsumuar më parë në metodikën e drejtimit të punëve dhe prapambetjen në zotërimin e teknologjisë bashkëkohore, është tregues i dështimit të qeverisë Rama dhe i deklaratave të këtij të fundit për rilindje të rradhëve të uniformave blu, me emërimin e Lleshajt në vend të Fatmir Xhafajt.

Emërimi i xhaketvjetërve nuk jep shpresë se mund të sjellë një polici bashkëkohore, qoftë edhe nisur nga fakti i konfliktit që këta kuadro të kohës së makinës së shkrimit, faksit, telefonit fiks etj., kanë me teknologjinë bashkëkohore. Përdorimin e kompjuterit ngadalësisht me dy gishta, si dhe punimin e mjeteve elektronike me vetëm versionin si telefon fiks, nga ish shefat e rikthyer e pohojnë si të qenë masivisht evident, dhe pra kjo jo për faj të tyre. Sikurse ata janë të pafajshëm që qeveria Rama i gjuan për të rilindur policinë bashkëkohore./CAN.al