E fundit!

13:19 Aktualitet

Braho “shuplakë” politikës: Më vjen mirë që SPAK është i papëlqyer nga të dyja kahet

Kreu i SPAK, Klodjan Braho i ka dhënë një shuplakë politik...

Kryeministri duhej të vizitonte Shkozën jo zyrat e arkivave

14 Janar 2019, 18:10, Aktualitet CNA

Nga Kastriot Devishi

– Godina aktuale e Drejtorisë së Përgjithshme të Arkivave është ndërtuar rreth vitit 1942 për të qenë Komanda e Përgjithshme e Karabinierisë. Për këtë arsye edhe burgu gjendet aty afër. Godina u përshtat në vitin 1951 për administratën, prej Ministrisë së Punëve të Brendshme. Kohë pas kohe dokumentet u dërguan jashtë kryeqytetit (koncepti komunist i arkivave), ndërsa godina ngeli vetëm për zyra. Në të gjendet vetëm një numër i kufizuar fondesh arkivore. Gjithë arkivi u grumbullua nga Skrapari, Kurbneshi e Gramshi në një ish repart ushtarak në Shkozë, gjatë një proces që zgjati në vitet1993-1997. Duke u bërë gabimi që nuk u ndërtua një godinë komplekse për arkivat, Shqipëria është i vetmi vend në Europë pa të tilla. Godina aktuale ku z.Rama përuroi sot cilësinë e karrigeve dhe bojës së mureve të një prej sallave të leximit e ka përfunduar me kohë misionin e saj. Në mungesë të kapacitetit për të mbajtur fonde arkivore, tashmë ajo duhet t?i përkasë të shkuarës. Rrjeti arkivor nuk është çështje tavolinash, sportelesh e zyrash. Këto as i ndien fare. Ndërsa propaganda është e paqenë qysh në çastin kur del nga goja e agjituesve. Nga kriza e thellë ku ndodhet rrjeti arkivor, qeveria duhet të kontribuojë vetëm me gjetjen e trojeve, ndërtimin e godinave dhe sigurimin e personelit (shumë i vogël aktualisht). Gjatë kohës që z.Rama është kryeministër janë bërë një sërë hapash të gabuara në drejtim të arkivave. Fillimisht u emërua një kryetar partie drejtor i përgjithshëm, duke shkelur haptazi ligjin, u formua Autoriteti ?për hapjen e dosjeve? në shkelje të plotë të ligjit të arkivave, u shkrinë 12 arkivat vendorë (në çdo qendër qarku) për t?u bërë një drejtori me 31 punonjës (urdhri nr.27, datë 2.2.2018 i kryeministrit për strukturën e DPA-së me 139 punonjës) me sektorë në Tiranë, Fier, Elbasan, Shkodër (duke zhvendosur dokumente nga njëri qark në tjetrin, krejt pa arsye), si dhe ka nisur një investim i gabuar mes ferrash në Shkozë për të ndërtuar një depo të re. Nuk kanë godina Arkivi i Sistemit të Ministrisë së Brendshme dhe Ministrisë së Drejtësisë. Kanë probleme arkivat vendorë. Ka problem vetë AQSH-ja, etj. Një numër i madh dokumentesh ndodhen në kushte shumë të këqija, e shumë të tjera kanë kaluar çdo afat përpunimi. Kryeministri duhej të vizitonte depon e Shkozës e jo të shihte zyrat e Drejtorisë së Përgjithshme të Arkivave. Së paku të krijonte një përshtypje të përgjithshme sa larg të qenit shtet normal jemi. Autori ka shërbyer si drejtor i Arkivit të Ministrisë së Brendëshme.