Dëbora “izolon” Korçën/ Vetëm një borëpastruese për gjithë qytetin

11 Janar 2019, 12:39, Aktualitet CNA

Reshjet e dendura të dëborës të rëna gjatë ditëve të fundit kanë shkaktuar vështirësi dhe izolim të disa zonave në disa qarqe të vendit.

Një ndër qytetet problematike mbetet edhe Korça, ku për pastrimin e rrugëve punon vetëm një borëpastruese.

Reshjet e dëborës e kanë bllokuar totalisht Korçën, ndërsa mezi janë pastruar vetëm disa akse kryesore, sepse rrugët e tjera janë kthyer në akull dhe situata është emergjente.

Firma që pastron qytetin, e paguar nga Bashkia e Korçës rreth 20 milion lekë, ka pastruar vetëm disa rrugë dhe trotuare dhe ndërkohë ajo ka vetëm një borëpastruese.

Pra, në Korçë ndodhet vetëm një borëpastruese dhe një tjetër mjet i përshtatur. Bashkia e Korçës përpiqet që nëpërmjet ndërmarrjeve të shërbimit të bëjë pastrimin e dëborës.

Kjo ndodh ndoshta për faktin se prej kohësh nuk binte kaq shumë dëborë në Korçë. Prej pothuajse pesë vitesh nuk ishte parë një situatë e tillë në Korçë, ku rrugët janë mbuluar nga akulli.

Ndërkohë reshjet e ditëve të fundit kanë nxjerrë në pah sërish të njëjtin problem. Për qytetin e Korçës ka vetëm një borëpastruese dhe një mjet të përshtatur. Por, a mundet që vetëm me këto mjete, që ndoshta edhe janë të vjetra, të bëhet pastrimi i një qyteti me rreth 30 mijë banorë?

Kjo është e pamundur me kushtet atmosferike me të cilat po përballet qyteti dhe me gjendjen që po kalon sot, ku shumica e rrugëve, rrugicave dhe trotuareve janë të ngrira.

Pra, nuk është hedhur kripa që në fillim dhe nuk janë mjetet e duhura për ta bërë gjithë pastrimin dhe ndoshta ka ardhur koha që situata të ndryshojë dhe të shikohet ndryshe jo vetëm nga Bashkia, por edhe bizneset në Korçë. Edhe nga vetë firma që bën mirëmbajtjen dhe pastrimin e rrugëve.

Bashkia duhet të shtojë fondet në situatë emergjence dhe në Korçë të ketë borëpastruese.

Në situatën në të cilën ndodhet sot Korça, është e pamundur të shkosh për të kaluar fundjavën. Megjithëse rrugët nacionale mund të jenë të hapura, brenda në Korçë trotuaret dhe rrugicat janë të ngrira dhe mund të thyesh kokën.

Një nga atraksionet turistike më të mëdha dimërore në vendin tonë, tashmë mund të kthehet në një nga pikat më të rrezikshme sepse qyteti nuk pastrohet nga dëbora dhe nuk kryhet shërbimi i duhur në raste të tilla emergjente./CNA.al