web counter
LEXO PA REKLAMA!

SHKARKO APP

App Store
Google Play

E fundit!

x

Skandal në Vetting/ A njihen me njëri-tjetrin Fredi dhe Suela?

1 Janar 2019, 14:30, Aktualitet CNA

Idiotësia e një gazetari nën hetim për pastrim parash dhe nxitimi i një juristeje në konflikt interesi, kanë njollosur papritur procesin e vettingut.

Le ta tregojmë fabulën e asaj çfarë ka ndodhur dhe personazhet përkatës në mënyrë të thjeshtë.

Historia nis tri javë më parë, ku një portal informativ i udhëhequr nga Alfred Peza (Alpeneës.al), nisi publikimin e disa dokumenteve që lidheshin me pasuritë e deklaruara të familjarëve të prokurores Rovena Gashi. Kjo e fundit kishte depozituar dokumentet dhe deklarimet në KPK (Komisioni i Pavarur i Kualifikimit), sepse po i nënshtrohej vettingut.

Portali i Pezës kishte siguruar dokumentet ekskluzive të deklarimeve të pasurisë dhe nisi publikimin e tyre me një metodë të çuditshme.

Portali i drejtonte pyetje publike prokurores Gashi për detaje teknike të përkatësisë pasurore, pyetjet ishin sulmuese dhe intimiduese, aq sa dukej sikur ishte Aranit Çela që mund të kishte hapur këtë portal.

Por mungesa e profesionalizmit, linçimi dhe sulmet tendencioze në portalin e Pezës ishin vetëm njëra anë e medaljes, ana tjetër ishte idiotësia e tij.

Ndërsa kryente publikimet Peza nuk e kuptonte se në fakt po kompromentonte procesin e vettingut ndaj Rovena Gashit.

Kompromentimi i procesit vinte për dy arsye:

Alfred Peza është në konflikt të drejtpërdrejt interesi me prokuroren Gashi, pasi ajo direkt e ka hetuar për pastrim parash dhe i ka referuar dosjen në prokurorinë e Krimeve të Rënda. Kjo dosje është në proces dhe sot, zoti Peza është zyrtarisht nën hetim.

Dokumentet që ekspozoi zoti Peza, ishin autentike dhe gjendeshin vetëm në një institucion. Letrat gjendeshin vetëm në Komisionin e Pavarur të Kualifikimit (KPK).

Pra Peza, ndonëse në konflikt interesi, ndonëse i angazhuar me një sulm të egër, linçues, tendencioz ndaj Gashit, paralelisht sulmoi dhe dekonspiroi dhe burimin që e kishte furnizuar, KPK-në.

E gjitha ishte një koktejl interesant mes shtysave inatçore, konfliktit të interesit dhe idiotësisë.

Pasi publikoi serialin linçues me dokumente të rrjedhura nga KPK-ja, një tjetër media, Exit.al, iu drejtua zyrtarisht misionit të OMN-së për ta pyetur se si kishin rrjedhur dokumentet dhe a do hetoej kjo që po ndodhte?

Përgjigja që ktheu OMN-ja konfirmoi se misioni ndërkombëtar i monitorimit po investigonte zyrtarisht rrjedhjen e dokumenteve.

Por sot historia ka marrë një rrjedhë të papritur, pasi portali Boldneës.al ka zbuluar se konflikti i interesit shkon përtej Alfred Pezës, në skandal del dhe emri i një juristeje të quajtur Suela Zhegu.

Sipas të dhënave të siguruara nga Boldneës.al, rezulton se zonja Zhegu udhëhiqte në KPK procesin e verifikimit të prokurores Rovena Gashi.

Në kohën kur rrodhën dokumentet ishte zonja Zhegu juristja që shqyrtonte dosjen e Gashit. Më pas zonja Zhegu dha dorëheqjen si udhëheqëse e kësaj dosje, por dorëheqjen e dha vetëm pasi rrodhën dokumentet.

Zonja Zhegu u tërhoq vetëm pasi media nisi të interesohej pranë OMN-së për rrjedhjen e letrave, por lidhjet e saj familjare çojnë në një konflikt të fortë interesi personal, konflikt direkt që ajo ka me Rovena Gashin.

Bashkëshorti i zonjës Zhegu është marrë i pandehur nga prokuroria e Durrësit për një çështje fallsifikimi të dokumentave pronësore. Ndërsa personi që e denoncoi bashkëshortin e zonjës Zhegu është kunati i prokurores Rovena Gashi.

Pra ndërsa zonja Zhegu shqyrtonte dosjen e pasurisë së Rovena Gashit, të dhënat e kësaj dosje rrodhën në portalin e Alfred Pezës i cili është nën hetim për pastrim parash nga referimi i Rovena Gashit.

Një pjesë e dokumenteve që publikonte Alfred Peza ofronin të dhëna dhe për pasuritë e kunatit të Rovena Gashit, pikërisht kunati i Gashit ishte ai që kallëzoi penalisht bashkëshortin e Suela Zhegut, juristes që shqyrtonte dosjen.

Sikur dikush t?i kishte vënë detyrë vetes që të njolloste procesin e vettingut, zor se mund të bënte dot më mirë se kaq.

Gazetari Alfred Peza dhe juristja Suela Zhegu, të dy nga pozitat e një konflikti të thellë interesi, kanë vënë në lëvizje OMN-në e cila i dyshon ata si bashkëpunëtorë në një skemë të linçimit dhe goditjes antiligjore të prokurores Rovena Gashi.

Por nëse Alfred Peza dhe Suela Zhegu kanë bërë autogol, duke u bërë protagonistë në konflikt interesi, e gjithë kjo fabul, shtron pyetje më serioze, që tejkalojnë idiotësinë e Pezës apo implikimin e Zhegut.

Sepse procesi verifikues për Rovena Gashin tashmë është bërë kazus, tashmë kemi provën konkrete se si një proces për të cilin janë shpenzuar energji pafund, se si një process për të cilin del gjasme si garant dhe ambasadori amerikan, degradon në një fushatë idiote linçimi e tipit Aranit Çela, duke kompromentuar besueshmërinë e KPK-së dhe duke nxjerrë në dritë jo vetëm konfliktin e interesit, por dhe metodat antiligjore, shantazhuese, që po përdoren për goditjen e prokurorëve dhe gjyqtarëve. / Hashtag.al





Lajmet e fundit nga