Panik në politikën shqiptare/ Rrezikohen mbi 500 zyrtarë të lartë

1 Dhjetor 2018, 09:42, Aktualitet CNA

Struktura e Posaçme Antikorrupsion pritet që të shkaktojë tërmet në politikën shqiptare. Më 11 dhe 12 dhjetor ngrihen KLGJ e KLP dhe këto organe do të emërojnë gjyqtarët dhe prokurorët që do të hetojnë të korruptuarit.

Por kush rrezikon nga SPAK? Nga do të nisë puna? Të parët që rrezikojnë janë sigurisht ata që kanë çështje ende të hapura. Të gjitha dosjet që janë te Krimet e Rënda do të transferohen te SPAK. Por të rrezikuar janë dhe ata pushtetarë që kanë pasur çështje në prokurori dhe hetimet janë pushuar.

Pak ditë më parë kryeprokurorja Arta Marku nxori një udhëzim, ku ka kërkuar që të gjitha dosjet e krimit të organizuar dhe korrupsionit të rishqyrtohen dhe të ketë hetim pasuror për të akuzuarit. Në udhëzim është bërë e ditur se brenda 2 muajsh të gjitha dosjet që prokuroritë në vend kanë për afera korrupsioni duhet t?i dërgojnë pranë Krimeve të Rënda.-raporton gaqzeta Sot.

Me shumë gjasë në shkurt ose mars Krimet e Rënda do të shkrihen dhe të gjitha dosjet që do të grumbullohen për hetim pasuror do i kalojnë SPAK. Pritet që njësia e posaçme që do ngrihet te Krimet e Rënda të nisë hetim pasuror me disa prej dosjeve dhe pastaj kjo e drejtë i kalon Prokurorisë së Posaçme Antikorrupsion.

Sa i takon korrupsionit do ketë hetim pasuror për 21 vepra penale, ku përfshihen korrupsioni aktiv, pasiv, shpërdorimi i detyrës, abuzimi me tenderat, fshehja e pasurisë, etj.

Vetëm KLSH dhe ILDKP kanë kallëzuar rreth 1.100 persona për fshehje pasurie e abuzime me detyrën. Po ashtu për disa persona ka pasur dhe kallëzime penale nga ministri të ndryshme. Nëse shihen raportet vjetore të prokurorisë, në një mesatare rezulton se gati 50 për qind e padive të ILDKP dhe KLSH kanë përfunduar në gjykatë dhe të akuzuarit kanë marrë dënimin e merituar. Shumica që kanë shkuar në gjykatë janë njerëz të thjeshtë, ndërsa pushtetarët e lartë i kanë shpëtuar ndëshkimit. Pra bëhet fjalë për ish-ministra, ministra, deputetë, ish-deputetë, kryetarë bashkie, ish-kryetarë bashkie, etj. Sipas statistikave në vitet e fundit rreth 500 persona janë kanë hedhur paq dhe prokuroria ka pushur hetimet për ta. Sipas udhëzimit të Markut, për këdo person që ka qenë në hetim do ketë hetim pasuror. Pra pritet që rreth 500 dosje të kalojnë automatikisht te SPAK. Kjo do të thotë se shumë emra të njohur mund të përfundojnë të pandehur.