Deklarata e fortë/ Kërkohet arrestimi i Vangjush Dakos

5 Nëntor 2018, 10:56, Aktualitet CNA

Deputeti i Partisë Demokratike, Tritan Shehu në një deklaratë për mediat ka kërkuar arrestimin e kryebashkiakut të Durrësit, Vangjush Dako.

Shehu tha se përgjimet e dosjes 339 kanë dëshmuar lidhjen e tij të vazhdueshme me krimin, para, gjatë dhe pas zgjedhjeve, ndaj dhe arrestimi duhet të bëhet një orë e më parë dhe pa vonese.

?Dako ka bashkëpunuar me bandat e Durrësit. Përgjimet e dosjes 339 kanë faktuar se Dako është në komunikim të vazhdueshëm me to. Ai duhet të jetë në burg. Janë publikuar vetëm tre përgjime dhe janë maja e ajsbergut. Dako duhet të arrestohet pa vonesë. Mos arrestimi i Dakos është dëshmi e kapjes së Rilindjes nga krimi i organizuar?,- u shpreh Shehu.

Deklarata e plotë:

Përgjimet e dosjes 339 kanë faktuar se Vangjush Dako është në komunikim të vazhdueshëm me bandat para, gjatë dhe pas zgjedhjeve, duke shkëmbyer me pasuri dhe pushtet votat e blear për tepsinë e Edi Ramës.

Faktet e krimit elektoral të Vangjush Dakos janë të qarta dhe për këtë krim ai duhet të jetë në burg!

Deri tani janë publikuar vetëm 3 përgjime, që janë maja e ajsbergut e provave se Vangjush Dako e qeveris Durrësin me bandat më të rrezikshme, njësoj si Edi Rama qeveris vendin me krimin e organizuar.

Përgjimet zyrtare të prokurorisë nga dosja 339 nxjerrin në pah marrëdhënien e ngushtë të Vangjush Dakos me bandën e Avdylajve, trafikantë ndërkombëtarë droge nga Amerika latine në Euopë, të cilët i ka përdorur në fushatë për të blerë zgjedhjet. Përgjimet faktojnë gatishmërinë dhe garancinë e Vangjush Dakos për t?i mbaruar punë bandës.

Vangjush Dako duhet të arrestohet pa vonesë.

Çdo ditë në liri ai shkatërron prova dhe manipulon dëshmitarët, i ndihmuar plotësisht nga kryeministri i vendit Edi Rama.

Mosarrestimi i Dakos është dëshmia më e qartë e kapjes së shtetit nga krimi i organizuar me mbështetje të organizatës kriminale të Rilindjes të drejtuar nga Edi Rama.

Mosarrestimi i Dakos është prova e shkatërrimit total të prokurorisë së krimeve të Rënda.

Mosarrestimi i Dakos hedh në erë alibitë qesharake për suksesin e reformës në drejtësi.

Ndodhemi para një momenti dramatik për fatin e drejtësisë dhe të vendit.

Nuk mund të ketë as drejtësi as paqe sociale, kur arrestohen dhe mbahen në burg ata që protestojnë për bukën e gojës dhe bredhin të lirë politikanë kriminelë si Vangjush Dako, vetëm pse gëzojnë mbështetjen e kreut të qeverisë.

Në Shqipëri nuk ka për të patur as drejtësi, as luftë kundër krimit dhe asnjë zhvillim normal pa u ndëshkuar krimi elektoral që mban në pushtet qeverinë ilegjitime të Edi Ramës!/ CNA.al