U shkarkua nga Arta Marku/ Sokol Stojanit nesër para Vetingut, njihuni me pasurinë e tij

29 Tetor 2018, 19:13, Aktualitet CNA

Ditën e nesërme do të dalë përpara Vettingut, Sokol Stojani, prokurori i cili u rebelua ndaj Prokurores së Përgjithshme të Përkohshme, Arta Marku. Mësohet se trupa gjykuese që do të kryejë procesin e vetingut për të, drejtohet nga Brunilda Bekteshi dhe ka si anëtare Suela Zhegun dhe Valbona Sanxhaktarin.

Stojani kundërshtoi Markun në lidhje me hetimet disiplinore ndaj prokurorëve dhe detyra të tjera të përcaktuara nga ajo. Për këtë arsye Marku urdhëroi shkarkimin e Stojanit, më 19 shtator.

Përpara se të shkarkohej, Stojani mbante postin e Drejtorit të Drejtorisë së Ndihmës për Subjektet e Posaçme, Mbrojtjes së Dëshmitarëve, Inspektimit dhe Burimeve Njerëzore, Studimeve, Projekteve në Prokurorinë e Përgjithshme.

Ndërkohë Stojani tha për BIRN, se kishte dhënë dorëheqjen, pasi ndante pikëpamje tjetër për mënyrën e drejtimit dhe të rekrutimit të burimeve njerëzore.

Stojani e ka filluar karrierën në sistemin e drejtësisë në vitin 1994 dhe ka punuar për disa vite në Prokurorinë e Tiranës. Në vitin 2008, ai është emëruar prokuror në Prokurorinë e Përgjithshme dhe përgjatë 10 viteve të fundit ka mbajtur disa poste drejtuese, përfshirë edhe atë të anëtarit të Këshillit të Prokurorisë.

Skeda e tij është prodhuar nga BIRN pas administrimit të deklaratave të pasurisë së këtij subjekti nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasurinë e gjyqtarëve dhe prokurorëve që i nënshtrohen procesit të vetingut.

Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar të prokurorit Sokol Stojani nga viti 2003 deri në fund të vitit 2017.

Të dhënat e siguruara nga BIRN tregojnë se prokurori Sokol Stojani deklaroi pasuri familjare me vlerë 7 milionë lekë në vitin 2003. Sipas deklaratës së tij të parë të dorëzuar në ILDKPKI, Stojani zotëronte një apartament me vlerë 5 milionë lekë dhe një automjet ?Renault Clio? i deklaruar prej tij në vlerën 2 milionë lekë. [Shënim: Është e paqartë nëse vlera e automjetit është shënuar me lekë të vjetra apo të reja, por në këtë analizë është llogaritur ashtu siç është deklaruar nga subjekti].

Në fund të vitit 2017, pasuria familjare e zotit Stojani shënoi një rënie me 9 për qind, duke kapur vlerën e 6.3 milionë lekëve. Ai zotëron të njëjtin apartament të deklaruar në vitin 2003, likujditete me vlerë rreth 417 mijë lekë, kursime në cash 326 mijë lekë si dhe një automjet me vlerë rreth 625 mijë lekë.

Për periudhën 2003-2017, Stojani dhe familjarët e tij kanë deklaruar 32.6 milionë lekë të ardhura në total. Paga e tij dhe e bashkëshortes përbëjnë rreth 93 për qind të të ardhurave.

Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe ?flamujt e kuq? që identifikohen gjatë kontrollit. BIRN kreu kontrollin aritmetik/logjik për 14 vitet e deklarimit të prokurorit Stojani dhe të gjitha deklaratat rezultojnë pa probleme.

Duke qënë se ky raport bazohet në të dhëna statistikore të analizuara nëpërmjet një databaze, ai nuk nxjerr përfundime mbi pasurinë e subjektit nëse ajo është e ligjshme ose jo, por mëton të informojë publikun mbi pasurinë e deklaruar të zyrtarit publik nëpërmjet një formati të thjeshtë dhe të kuptueshëm grafik.