E fundit!

11:58 Aktualitet

ABI Bank ka refuzuar të paguajë gjobën 120 milionë për një portal gjobaxhi

ABI Bank ka refuzuar të paguajë gjobën 120 milionë për një...

Skandal me kreditë e këqija

29 Shtator 2018, 08:44, Aktualitet CNA

Çështja e kredive të këqija vazhdon dhe të jetë si shpata e Damokleut mbi qafën e brishtë të ekonomisë shqiptare. Kjo temë e nxehtë është trajtuar dhe do të trajtohet vazhdimisht nga teknicienët e Qeverisë, Bankës së Shqipërisë, Ministrisë së Financave dhe vetë bankave të nivelit të dytë, duke përfshirë edhe institucionet financiare jo-bankare. Pavarësisht teknikaliteteve, asnjëherë kjo gangrenë e ekonomisë shqiptare dhe bllokuese e dhunshme e rritjes ekonomike dhe të sistemit të kreditimit, nuk është trajtuar në relacionin dhe korelacionin sa të dyshimtë aq edhe të pistë që ka me vetë politikën, politikë-bërësit dhe qeveritarët që shkojnë e vijnë.

Me proceset e Vetting-ut dhe ngritjen e institucioneve të Reformës në Drejtësi, ka një interes publik të garantuar për të bërë edhe një Vetting të impaktit dhe lidhjeve që këta individë, politikanët dhe qeveritarët, në ndikimin negativ të rritjes sa artificiale aq edhe përkeqësuese të masës së kredive të këqia, me ndërhyrjet e paskrupullta, me mos-justifikimin e të ardhurave, me presionet e dyshimta të tregtimit të favoreve qeveritare dhe pushtetare.

Ky lloj Vetting-u financiaro-qeveritar-politik do të ishte njëlloj si hapja e kutisë së Pandorës në një diagnostikim të fenomenit të pashërueshëm të kredive të këqia dhe ndikimit politik dhe pushtetar që kanë drejtëpërdrejtë. Dhe këtë mund ta fillojnë fare kollaj që tek shifrat paraprake, ku rreth 35 kompani zënë rreth 75% të kredive të këqia. Pyetja është shumë e thjeshtë sa për të parët me peshën më të madhe, aq edhe për të tjerët që i ndjekin pas: Sa ndërhyrje politike dhe pushtetare ka pasur në aplikimin për këto kredi që vajtën keq? Ky vullnet fillestar për këtë lloj analize do t?i shërbente jo vetëm identifikimit të së keqes së ndërhyrjes politike, por edhe opinionit publik në marrëdhënien e tij me ta nëpërmjet votës, ashtu si dhe do t?i shërbente vetë ndërgjegjësimit të kësaj klase për të qëndruar sa më larg me duart e pista nga ekonomisë dhe sistemit të kreditimit që çalon.

Një paralajmërim modest: deputetë, ministra, drejtorë, zëvendësministra e plot të tjerë, do të identifikohen jo vetëm nëpërmjet emrave të tyre për këste që janë pamundësisht të përballueshme nga të ardhurat e deklaruara, por do të dilnin një mori shoferësh, badigardësh, lulishtarësh, kushërinjsh e lëng-stërlëngu, pas së cilëve fshihet lukunia e politikë-bërësve dhe pushtetarëve që me influencë politike dhe të pushtetit (të pamerituar) janë borxhlinj të pandreqshëm dhe ndikues negativë në gropën e kredive të këqija. Po a ka një vullnet të tillë?/ CNA.al