web counter
LEXO PA REKLAMA!

SHKARKO APP

App Store
Google Play

Shkëmbimi i kufijve/ Shehu: Ortek i rrezikshëm për Ballkanin

9 Gusht 2018, 16:56, Aktualitet CNA

Propozimet për ndryshim të kufijve ish-Ministri i Jashtëm, Tritan Shehu i konsideron ortekë të rrezikshëm për Ballkanin.

Në një intervistë për Report Tv, Shehu thotë se ky ka qenë një plan i hershëm i Beogradit për ti lanë jashtë BE vendet e Ballkanit.

“Unë këtë ide të shkëmbimit të territoreve i kam dëgjuar më përpara, realisht si produkt i politikave të Beogradit, për të mbajtur rajonin si një zonë të pa stabilizuar për të destabilizuar, lëshojnë të tilla ide që nuk janë vetëm të tyre, por edhe të disa aleatëve të tyre që duan ta shikojnë rajonin në trazira, rrëmujë, mungesë stabiliteti”, tha Shehu.

Ndërsa propozimin e Thaçit për bashkim me Kosovën të Preshevës, Medvegjës dhe Bujanovcit, ish-ministri i Jashtëm e konsideron si një platformë të ndërtuar në boshllëk.

“Tingëllon shumë bukur, duket si  një kështjellë e ndërtuar në rërë, si një megaplatformë e ndërtuar në boshllëk. Ca do shkëmbesh në lidhje me këtë gjë? Nëse dikush mendon se Serbia është kthyer në një lepurush të butë dhe është gati të japi çdo gjë, unë mendoj se gabon. Mbas Serbisë qëndrojnë të tjera fuqi, të cilat synojnë  të krijojnë destabilizim në rajon”, u shpreh deputeti demokrat.

Shehu ka komentuar gjithashtu edhe sulmin e Presidentit Thaçi ndaj Berishës duke e quajtur rrufe nga maja e Olimpit.

“Fatkeqësisht dëgjova presidentin e Kosovës të lëshojë disa rrufe, sikur të ishte në majën e Olimpit, anatemuse mbi Berishën, vetëm sepse Berisha bëri një denoncim,  dhe shfaqi mendimin e vet që është konstant në këto mendime. Deshi Thaçi me atë gjë të tregonte se ai ka një forcë mbinjerëzore, qiellore dhe lëshoi rrufetë mbi Berishën? Mendoi se në këtë mënyrë do të tregojë forcën e madhe të tij për të trembur Beogradin?, shtoi më tej demokrati.

Ndërkohë Shehu e ka quajtur të rrezikshme, idenë e Ministrit të Diasporës, Pandeli Majko, për heqjen e kufirit Shqipëri-Kosovë nga 1 janari i ardhshëm.

Përsa i përket aksionit opozitar, deputeti demokrat është shprehur se qëllimi kryesor është rrëzimi i Ramës nga pushteti.





Lajmet e fundit nga