Mediat italiane/ Shqipëria udhëheq trafikun e drogës

7 Gusht 2018, 15:43, Aktualitet CNA

Organizatat kriminale shqiptare kontrollojnë territore të mëdha, prodhojnë investime të kënaqshme dhe influencojnë në mënyrë aktive politikën shqiptare. Kështu fillon investigimi i publikuar në ?Oservatorin e Ballkanit dhe Transeuropës?, me seli në Itali.

Në shkrim thuhet se kriminaliteti në Shqipëri ka një peshë të madhe në ekonomi dhe në jetën sociale të vendit dhe pikun e ka pasur mes viteve 2013-2016. Më tej thuhet se bandat kriminale zënë një vend të rëndësishëm në Shqipëri, ndërsa policitë europiane kanë rritur vigjilencën ndaj tyre

Në shkrim Shqipëria konsiderohet si një vend që transporton sasi të konsiderueshme marijuane drejt Europës dhe është një vend tranzit për kalimin e kokainës dhe heroinës nga Afganistani. Sipas një raporti të DASH, rastet e sekuestrimit të drogës në Shqipëri janë rritur, ndërsa vihet në dyshim impenjimi i Qeverisë në luftën ndaj këtij fenomeni.

Të njëjtin vlerësim për vendin tonë, ka dhënë edhe raporti i drogës në Europë për vitin 2017.

Në shkrim përmendet rasti i sekuestrimit të 613 kg drogë në shtator në portin e Durrësit, i cili ishte fshehur Brenda një kontenieri me banane.

Gjithashtu thuhet se bandat kriminale shqiptare janë stabilizuar në Britani dhe janë kthyer në kërcënim.

Në raport është cituar një investigim i DASH, e cila ka zbuluar se paratë nga trafiku i dorgës, riciklohen duke ndërtuar kazino apo qëndra tregtare.

Më tej lakohet edhe emri i kreut të Bashkisë së Tiranës, i cili mbështet ndërtimin e pasurive të patundshme nëpërmjet partneritetit publik privat.

Dyshimi i riciklimet të parave të drogës thuhet në shkrim, përforcohet më shumë edhe pas rënies së ndjeshme të euros ndaj lekut.

Sipas raportit, ky fenomen ka shqetësuar edhe Komisionin Europian, i cili ka vendosur të shtyjë me një vit hapjen e bisedimeve për anëtarësim, si pasojë e nivelit të lartë të krimit të organizuar.

Qeveria e Edi Ramës duhet të punojë shumë në luftën kundër korrupsionit dhe drogës, si dhe duhet të arrijë rezultate konkrete shumë shpejt, mbyllet shkrimi i Oservatorit për Ballkanin.

https://www.balcanicaucaso.org/aree/Albania/La-criminalita-albanese-alla-conquista-dell-Europa-189434