Erion Veliaj show me sulmet ndaj Ilir Metës/ Zbulohet mesazhi për Ramën

31 Korrik 2018, 07:29, Aktualitet CNA

Dekreti për Teatrin ka kthyer dhe një herë përplasjet mes qeverisë dhe Presidencës. Ilir Meta dëgjoi thirrjet e opozitës dhe kërkoi rishqyrtim të ligjit, ndërsa kjo solli reagime nga ana e mazhorancës.

Më kritiku ka qenë kryebashkiaku Erion Veliaj, i cili në çdo dalje mediatike ka sulmuar presidentin Ilir Meta. Veliaj njihej si një mik i Metës dhe LSI. Edhe pse Rama nisi luftën me Metën dhe Kryemadhin, Veliaj qëndroi besnik ndaj tyre.

Afrimiteti i madh i Veliajt me LSI po rrezikon dhe një mandat të dytë të tij në Bashkinë e Tiranës. Veliaj po mban pas vetes kundërshtarët e kryeministrit dhe kjo nuk është pëlqyer nga Rama. Veliaj vijon aleancën me Shpëtim Idrizin e Bamir Topin sa i takon Bashkisë së Tiranës, edhe pse të dy ata po akuzojnë shumë fort Ramën e qeverinë.

Po ashtu nga LSI, Veliaj mori 4 këshilltarë bashkiakë. Sulmet e tij janë interpretuar si distancim nga rivalët e kryeministrit, por në qarqet politike flitet se e gjitha është një shoë. Vetë Meta dje refuzoi të reagonte ndaj Veliajt, ndërsa mediat e kontrolluara nga LSI janë shprehur hapur se Veliaj nuk e ka luftën me Metën, por e ka me Ramën. Sipas tyre ai po tenton të japë mesazhe se nuk është me LSI, në mënyrë që të marrë një mandat të dytë.-raporton gazeta Sot.

Edhe vetë brenda PS ka zëra që deklarojnë pikërisht të njëjtën gjë. Rama deri më tani nuk ka dhënë asnjë sinjal përfundimtar se Veliaj do jetë kandidat në zgjedhjet e 2019. Madje ai ka thënë se do jetë baza socialiste që do e vendosë se kush do jetë kandidat në Bashkinë e Tiranës dhe në të gjitha bashkitë e tjera.

Gazeta e ka deklaruar që më herët se Ramës nuk i ka pëlqyer afrimiteti i Veliajt me Kryemadhin dhe Metën dhe kjo mund ta mbajë larg mandatit të dytë kryebashkiakun. Por Veliaj ka shfrytëzuar si duket dekretin për t?i dhënë një mesazh të qartë kryeministrit Edi Rama. Veliaj po mundohet të tregojë se ai e ka armik Ilir Metën dhe nuk ka aleanca mes tij dhe LSI, në mënyrë që Rama të bindet se ai e meriton rikandidimin. Por ka zëra se miqësia e tij me Metën vijon dhe kjo është thjesht lojë.