SHISH kundër Top Channel/ Gënjen për infot

30 Korrik 2018, 20:31, Aktualitet CNA

Me 26 korrik 2018, televizioni Top Channel ka publikuar një dokument ku pretendon se faktohen lidhjet e gjykatësit Shkëlzen Selimi me bandat kriminale të qytetit të Fierit, të cilat janë përfshirë në trafik ndërkombëtar të narkotikëve.

Për këtë dokument Top Channel iu referua Shërbimit Informativ Shtetëror.

Sipas TCH, ngjarja për të cilën SHISH ka përgjuar, gjyqtarin Shkëlzen Selimi, ka ndodhur në dimrin e vitit 2011 në qytetin e Vlorës, aty ai ku ka punuar si gjykatës.

?Gjatë ndjekjes së procesit informativ në ngarkim të këtij shtetasi nga një ngjarje e rastësishme që lidhet me arrestimin e tij më datë 27 nëntor të vitit 2011 për armëmbajtje pa leje, u vërtetuan disa lidhje korruptive të këtij grupi në sistemin e drejtësisë dhe policisë , të cilat brenda 3 ditëve mundësuan nxjerrjen e tij në gjendje të lirë, në datën 30 nëntor 2011. Lidhjet korruptive të këtij grupi në sistemin e drejtësisë referuar ngjarjes konkrete janë: Zoti Shkëlzen Selimi, gjyqtar i Gjykatës së Lartë?, thuhet në dosjen e publikuar nga TCH.

Nga ana tjetër Shërbimi Informativ Shtetëror, ka reagur ditën e sotme, duke mohuar se informacioni i publikuar ka dalë prej tij.

?Shërbimi Informativ i Shtetit shpreh shqetësimin e thellë për rastet e përsëritura të pasqyrimit në media të informacioneve apo të dhënave që pretendohet se u referohen dokumenteve të hartuara nga SHISH-i ndër vite.

SHISH-i i bën me dije opinionit publik se nuk ka asnjë koment specifik për autenticitetin e dokumenteve të pretenduar të inteligjencës.

Megjithatë SHISH-i nënvizon me forcë se përdorimi i emrit të Shërbimit dhe referimi për format e metodat e punës së tij, me synimin për të siguruar besueshmëri të shtuar të deklaratave apo akuzave në media dhe opinionin publik, sjellin një cënim të ndjeshëm të aktivitetit të komunitetit të inteligjencës. Ato rrezikojnë të ndikojnë aftësinë e Shërbimit Informativ për garantimin e sigurisë kombëtare. Shërbimi Informativ i Shtetit vlerëson se çdo shkelje në administrimin e informacionit të klasifikuar, kudo ku ajo ndodh, mund të dëmtojë rëndë punën dhe të ekspozojë punonjësit e Shërbimit përballë rreziqeve të paparashikuara?, thuhet në reagimin e SHISH.

Kujtojmë se gjatë seancës dëgjmore në KPK , gjyqtari Shkëlzen Selimi akuzoi Komisionin e Vettingut, për nxjerrjen e të dhënave që as ai vetë nuk i dinte./CNA.al