Ultimatumi i Donika Prelës/ Thellohen hetimet për dosjet e nxehta, ja zyrtarët që rrezikojnë

31 Korrik 2018, 07:19, Aktualitet CNA

Prokuroria do të thellojë shumë shpejt hetimet për të gjitha dosjet e bujshme që po rrinë pezull prej muajsh. Një ditë më parë u bë e ditur se Kryeprokurorja e Krimeve të Rënda Donika Prela, përmes një urdhri drejtuar oficerëve të Policisë Gjyqësore ka kërkuar informacion mbi hetimet për të gjitha çështjet e rëndësishme. Prej datës 20 korrik në zyrën e zonjë Prela janë depozituar të dhëna për një sërë dosjesh. Gazeta Sot ka mësuar se bëhet fjalë për raste ku përfshihen zyrtarë dhe njerëz të botës së krimit.

Dy dosje të tjera të rëndësishme janë ato në ngarkim të ish-ministrit Saimir Tahiri dhe ndaj ish-kryeprokurorit Adriatik Llalla. Sa i takon Tahirit, prokuroria tentoi disa herë arrestimin e tij, por gjykata e rrëzoi. Momentalisht Tahiri është nën hetim në gjendje të lirë. Nga ana tjetër telashet për Llallën janë shtuar. Ish-kreu i akuzës është nën hetim për 4 vepra penale, ndërsa pak ditë më parë pasuria e tij u vu në sekuestro preventive, pasi dyshohet se ka bërë pastrim parash. Në bazë të ultimatumit të Prelës, duket se dhe për këta të dy hetimet do të thellohen.-raporton gazeta Sot.

Mes emrave të akuzuar ka dhe ish-funksionarë të LSI. Një ndër personat që po hetohet është ish-Drejtori i Autoritetit Rrugor, Dashamir Xhika. Ai po hetohet si për aferën me rrugën Tiranë-Elbasan, ashtu dhe për rrugën Elbasan-Gjinar. Për këtë të fundit nën hetim është dhe Andi Toma, ish-drejtor i ARRSH në kohën kur në qeveri ishte PD. Një tjetër drejtor i LSI nën hetim është Ardian Alushi, ish Drejtor i Përgjithshëm i Agjencisë Kombëtare të Ujësjellës Kanalizimeve. Ai është paditur nga Ministria e Transportit për abuzime me ndërtimin e kanalizimeve në kryeqytet.

Po ashtu në listë janë dhe një sërë dosjesh të tjera të bujshme. Një ndër to është ajo e vëllait të ministrit Fatmir Xhafaj. Pas denoncimeve të PD nuk ka pasur asnjë zhvillim nga hetimet. Tjetër rast është kallëzimi i deputetit Taulant Balla ndaj kreut të PD, Lulzim Basha, mbi akuzat për 3.4 milionë eurot në ?Toyota Yaris?. Një tjetër çështje nën hetim është ajo ndaj rektorit Mynyr Koni ndaj dekanit Dhori Kule, të akuzuar për shpërdorim të detyrës. Për të gjitha dosjet pritet që Donika Prelat të japë ultimatum të përshpejtohen hetimet dhe në këtë mënyrë ka shumë emra që rrezikojnë.