LSI zbulon kush fshihet pas Arta Markut

11 Korrik 2018, 17:12, Aktualitet CNA

Lëvizja Socialiste për Integrim ka akuzuar kryetarin e Komisionit të Ligjeve, Ulsi Manjën, për shkelje të rregullores.

Në një deklaratë për shtyp, deputetja e kësaj force politike, Silva Caka, sqaroi se Manja e mbylli më herët mbledhjen e sotme, për të shpëtuar Prokuroren e Përgjithshme, Arta Marku, nga pyetjet e deputetëve, në lidhje me çështjet e kriminalitetit.

Sipas Cakës, përgjigjet e Markut me nuk e di dhe nuk kam informacion, janë në shkelje të hapur me rregulloren e Kuvendit.

Deputetja e LSI ka shtuar më tej se kjo që ndodhi sot është demostrim i frikës së Edi Ramës, i cili po i jep urdhra ushtarëve të tij për të ruajtur lidhjet e qeverisë me krimin.

“Sot në prezencë të medias dhe të gjithë qytetarëve shqiptar mazhoranca me gjithë arrogancën që e karakterizon, ashtu siç zgjodhi jashtë çdo parashikimi ligjor dhe kushtetues prokuroren e përgjithshme të përkohshme, ashtu zgjodhi ta shpëtonte dhe nga pyetjet e deputetetëve të komisionit të ligjeve.

Duke shkelur me të dyja këmbët rregulloren e Kuvendit, Kryetari i Komisionit të Çështjeve ligjore të administratës publike dhe të drejtave të njeriut z.Ulsi Manja mbylli sot në mënyrë të paligjshme mbledhjen ku raportonte Prokurorja e Përgjithshme e Përkohshme në lidhje me çështjet e kriminalitetit në vend.

Në interes të të gjithë shqiptarëve deputetët e Kuvendit të Shqipërisë kishin një mori me pyetje lidhur me situatën e rënduar të kriminalitetit në vend dhe z.Manja pasi pa që Prokurorja e Përgjithshme e Përkohshme e propozuar dhe e zgjedhur nga ai vetë dhe nga Edi Rama, po u përgjigjej me nuk e di dhe nuk kam informacion, në shkelje të çdo parashikimi të rregullores së Kuvendit siç është mësuar të shkeli çdo parashikim ligjor dhe kushtetues vendosi ta mbylli mbledhjen pa u ezauruar çështjet shqetësuese dhe kompromentuese që duhet të ngrinin të gjithë deputetët e Komisionit.

Frikën e Edi Ramës dhe degradimin e pushtetit të tij po e shohim çdo ditë me urdhrat e paligjshëm që po i jep ushtarëve të tij me synimin e vetëm për të ruajtur lidhjet e errëta dhe të qeverisë me krimin”,- u shpreh ndër të tjera deputetja e LSI. /CNA.al