web counter
LEXO PA REKLAMA!

SHKARKO APP

App Store
Google Play

SHBA/ Ministrja e Mbrojtjes Olta Xhacka nis takimet zyrtare në Senat dhe Kongres

17 Prill 2018, 11:13, Politikë CNA

Ministrja e Mbrojtjes Olta Xhaçka, po zhvillon një vizitë zyrtare në Shtetet e Bashkuara të Amerikës me ftesë të sekretarit amerikan të Mbrojtjes, James Mattis.

Në ditën e parë të kësaj vizite, ministrja Xhaçka u prit në takime të veçanta në Capitol Hill nga senatori Tom Cotton dhe kongresmenët Matt Gaetz dhe Jim McGovern.

Në takimet me zyrtarët e lartë amerikanë, ministrja Xhaçka vlerësoi mbështetjen e SHBA-ve për reformën në drejtësi në vendin tonë, duke e cilësuar si shumë të rëndësishme për axhendën europiane të Shqipërisë.

Me senatorin Tom Cotton dhe kongresmenët Matt Gaetz e Jim McGovern, ministrja Xhaçka diskutoi gjithashtu mbi partneritetin strategjik mes SHBA dhe Shqipërisë, si dhe mbështetjen e qeverisë amerikane për Forcat tona të Armatosura.

Gjatë qëndrimit të saj në Washington, ministrja Xhaçka u takua me përfaqësues të kompanisë amerikane, elitë në industrinë ushtarake në botë, Lockheed Martin, me të cilën qeveria shqiptare ka lidhur kontratë në muajin nëntor të vitit të kaluar për blerjen e sistemit të integruar të vëzhgimit të hapësirës ajrore shqiptare.

Gjatë takimit me përfaqësues të Lockheed Martin, ministrja Xhaçka u shpreh e interesuar për praninë e investimeve të mëtejshme të industrisë ushtarake amerikane në Shqipëri.

Ministrja Xhaçka e cilësoi Sistemin e Integruar për Vëzhgimin e hapësirës ajrore me rëndësi, jo vetëm për sigurinë kombëtare të Shqipërisë, por për të gjithë Aleancën.

Gjatë vizitës së saj në Shtetet e Bashkuara, ministrja e Mbrojtjes, Olta Xhaçka do të pritet në një takim të veçantë nga sekretari amerikan i Mbrojtjes, James Mattis.





Lajmet e fundit nga