AMA, takim me ekspertët/ “Përdorimi i shqipes në media, në kushte emergjence”

17 Prill 2018, 14:24, Sociale CNA

Sot, në mjediset e Autoritetit të Mediave Audiovizive, u zhvillua tryeza e diskutimit: ?Respektimi i standardit të shqipes në transmetimet audiovizive?. Kjo temë u trajtua në funksion të respektimit të standardit të folur dhe të shkruar të shqipes në përmbajtjet audiovizive. Çështja e respektimit të rregullave të gjuhës shqipe ka kohë që është bërë shqetësuese në radio dhe televizione.

Zëvendëskryetari i AMA-s, z. Sami Nezaj, përshëndeti aktivitetin dhe i ftoi mediat e pranishme të bëheshin proaktive në respektimin e gjuhës shqipe, duke e cilësuar përdorimin e kësaj të fundit në kushte emergjence.

Nga dy shqyrtime tematike që ka zhvilluar AMA kohët e fundit, u evidentuan problematika në respektimin e normave të standardit të shqipes nga televizionet kombëtare dhe ato informative, të cilat kanë një ndikim të rëndësishëm në audiencë; kjo vihet re edhe në transmetimet radiofonike.

Disa nga çështjet kryesore që ishin vënë re, u janë bërë të ditura dhe vetë OSHMA-ve të monitoruara, që ishin në fokus të diskutimit dhe pjesë aktive e tryezës.

Një studim shumë interesant u paraqit nga Prof. Asoc. Linda Mëniku pedagoge pranë Departamentit të Gjuhës Shqipe në Fakultetin e Historisë dhe Filologjisë. Znj. Mëniku theksoi, në punimin e saj, se emergjenca për përdorimin e saktë të gjuhës na ka trokitur të gjithëve në derë dhe secili nga aktorët duhet të bëjë pjesën e tij për moszhvillimin e kësaj dukurie. Znj. Mëniku i ilustroi me shembuj konkretë të gjitha shkeljet në rrafshin e përdorimit të gjuhës shqipe në median audiovizive.

Edhe mediat e pranishme e pranuan situatën dhe treguan vullnet për të përmirësuar mjedisin gjuhësor në mediat përkatëse. Përfaqësues nga Radio Kontakt, Vizion Plus, Radio Televizioni Shqiptar, Platforma Tring, Televizioni Klan etj., u bënë pjesë aktive e tryezës duke dhënë mendime sesi mund të përmirësohet kjo gjendje. Gabimet në drejtshkrim e drejtshqiptim, përdorimi i gabuar i shenjave të pikësimit, përdorimi i pavend i fjalëve të huaja, përkthimet e pasakta të filmave dhe dublimet e shtrembëruara, u ngritën, po ashtu, si probleme nga të pranishmit në tryezë.

Ky aktivitet shërbeu si mjet për ndërgjegjësimin e radiove dhe televizioneve për përdorimin e saktë të gjuhës. Shumë shpejt kjo veprimtari do të pasohet nga veprimtari të tjera me po të njëjtin fokus. Nga ana tjetër, AMA u bën thirrje mediave të respektojnë elementin themeltar të identitetit tonë kombëtar, gjuhën shqipe./CNA.al