E fundit!

18:07 Aktualitet

Komisioni i Reformës Zgjedhore kërkon shtyrjen e afatit të punës

Komisioni i Posaçëm i Reformës Zgjedhore ka bërë kërkesë K...

Si u zbulua vjedhja e pronave në Lezhë?/ Flet denoncuesi, që çoi pas hekurave zyrtarët

20 Mars 2018, 09:44, Aktualitet CNA

Gjekë Çelaj, njëri nga denoncuesit e skandalit të pronave në Lezhë ka treguar se si e kuptoj, për grabitjen e pronave të trashëguara në bregdetin e Lezhës.

Në vitin 2017, Çelaj ka bërë denoncim në polici e prokurori, pasi u njoftua nga një topograf se po tjetërsoheshin pronat e tij.

Sipas tij kjo çështje nuk ka ngjyra politike, ashtu siç po lakohet.

?Në muajin gusht 2017 ne, si trashëgimtare të ligjshëm të një pjese të pronave të grabitura, jemi vënë në dijeni nga një topograf se kishte shumë mundësi, që dikush na kishte marrë pronat.
Verifikimet e kryera zbuluan faktin se pronësia e tokave ishte tjetërsuar.

Menjëherë u vumë në lëvizje dhe bëmë verifikimet tona dhe, fatkeqësisht, rezultoi se ishte e vërtetë. Atëherë unë bëra një kallezim penal në Prokurorine e Lezhës, të cilës i dërgova edhe vendimin e Gjykatës të vitit 2006 që na njihte si trashëgimtare te ligjshëm. Gjekë Çelaj thotë se i vendosi prokurorisë në dispozicion një sërë dokumentesh?, ka thënë Çela në emisionin “Tonight Ilva Tare”.

Çelaj ka folur më tej në lidhje me provat që i ka dërguar Prokurorisë.

?Gjithashtu i dërgova prokurorisë edhe disa dokumente të Arkivit Shtetëror, të kohës së Zogut dhe të vitit 1945 që provonin pronësinë tonë. Prokuroria filloi hetimet dhe pas dy javësh, me vendim të gjykatës Lezhë, prona u vendos nën sekuestro?, ka thënë ai më tej.

Ai ka treguar se i ka informuar thuajse të gjitha institucionet shtetërore rreth asaj që kishte ndodhur, por jo të gjitha institucionet i janë përgjigjur me korrektësi.

?Unë pata informuar thuajse të gjitha institucionet shtetërore rreth asaj që kishte ndodhur dhe m’u përgjigjen me korrektësi vetëm Prokuroria Lezhë, Policia e Shtetit dhe Zyra e Avokatit të Popullit. Siç e dini, hetimet çuan në arrestimin e disa personave. Jam tërësisht i çuditur me dy fakte:1. Përse dikush, për interesa politike mobilizon tufat e budallenjve në Lezhë për të protestuar kundër një procesi penal, aq më shumë që gjithë populli i Lezhës e di se në bregdetin e Lezhës është bërë kërdia me pronat dhe këtu janë të implikuar zyrtarë të mëparshëm dhe aktualë lokalë.

Siç e dini edhe ju, krimi nuk ka ngjyra politike. Ngjyrat e krimit janë dy: Imoraliteti dhe paligjshmëria. 2. Si mundet që “drejtësia ” shqiptare të gjejë prova të mjaftueshme për arrestimin e dikujt ditën e premte dhe pasi në Lezhë e deri në Tiranë fryu stuhi (mesa duket stuhia i ka dërguar gjyqtarit ” faqen Nr.13 ” të dosjes që kishte harruar ta lexonte) gjatë fundjavës, doli që provat janë “të pamjaftueshme” dhe ” fatkeqët ” që kanë vjedhur 235 mijë metra katror toka, tani duhet të sigurohen për 24 orë me polic tek shtëpia.

Neve si trashëgimtarë të pronës na intereson kthimi i pronës në gjendjen e mëparshme juridike dhe, megjithë dëmin që na kanë bërë. “Drejtësia ” në dashtë t’i dënojë, t’i lirojë ose t’i shpallë ” heronj të demokracisë dhe të moralit të saj “.

Ajo për të cilën unë, ashtu si organi i hetimit dhe policia që është marrë me çështjen, jam i sigurt është fakti, se nuk kemi të bëjmë me gjëra të rastit, sporadike dhe as pakujdesi, por me një rrjet të mirëorganizuar, koordinuar i cili ka përvetësuar pronat dhe nje pjesë e zyrtarëve shtetërorë kanë marrë shpërblimet në të holla. Si popull, kemi gati tri dekada që na kanë hypur në qafë gangsteret politike, banditët e “drejtësisë ” dhe budallenjtë që bëhen vegla të verbëra të tyre?, ka thënë Çela.

?Gjithashtu, më duhet t’ju them se as z. Edi Rama dhe as deputeti i zonës, z. Pjerin Ndreu nuk kanë kurrfarë meritash në ndjekjen e çështjes dhe konkluzionet e hetimit, pasi qëndrimet e tyre, gjatë gjithë kësaj kohe kanë qenë të heshtura, me gjithë informacionet që iu kemi dërguar.

Madje, nuk kemi marrë asnjë lloj reagimi prej tyre. Prandaj, mos iu jepni atyre merita që s’i kanë dhe i kërkoj politikës, majtas dhe djathtas, të rrijë larg kësaj çështjeje. Ne jemi dhe do të jemi të vendosur deri në fund në kthimin e të drejtave tona të shkelura?, ka thënë ai më tej.