Politika në alarm/ Prokuroria nis hetimet për zhdukjen e dosjeve të Sigurimit

2 Mars 2018, 08:17, Aktualitet CNA

Autoriteti për Hapjen e Dosjeve të Sigurimit ka vendosur të dërgojë para përgjegjësisë të gjithë ata persona që kanë zhdukur dosje dhe të dhëna sa i takon lidhjeve me ish-Sigurimin e Shtetit. ?Shumë njohës të këtij procesi kanë deklaruar se që pas rrëzimit të regjimit komunist qindra dosje janë zhdukur dhe në to ka pasur të dhëna për mjaft emra të njohur, disa prej të cilëve gjenden ende në politikë.?- shkruan gazeta Sot.

Mirëpo AIDSSH ka vendosur të hedhë dritë mbi përgjegjësit e kësaj masakre. Për këtë arsye, pak ditë më parë kreu i Autoritetit Gentiana Sula ka pasur një takim me kryeprokuroren Arta Marku dhe vetëm dje vetë AIDSSH ka zbardhur detaje të reja nga ky takim. Sipas asaj që thuhet në deklaratë, palët kanë rënë dakord për të bashkëpunuar dhe për zhdukjen e materialeve.

Sipas gazetes Sot, nëse vërtet nis një proces verifikimi në këtë aspekt, atëherë mund të prekë shumë emra të njohur. Kjo do të thotë se Autoriteti i Dosjeve mund të hedhë dritë mbi zyrtarët e lidhur me Sigurimin e Shtetit.

Verifikimi i zyrtarëve

Përveç kësaj, Autoriteti për Dosjet e Sigurimit ka nisur një proces verifikimi për një pjesë dërrmuese të zyrtarëve të administratës publike. Gazeta ka mësuar se pranë tij janë dorëzuar mbi 1 mijë kërkesa nga institucionet dhe po bëhet verifikimi nëse këta zyrtarë kanë pasur apo jo lidhje me sigurimin famëkeq të komunizmit.

Po ashtu bëhet e ditur se në sitë po kalojnë dhe kandidatë për Këshillin e Lartë Gjyqësor dhe për Këshillin e Lartë të Prokurorisë. AIDSSH po asiston dhe komisionet vetingut për verifikimin e gjyqtarëve dhe prokurorëve për të parë nëse ata kanë qenë pjesë e strukturave të komunizmit apo jo. Të kontaktuar nga gazeta, përfaqësues të Autoritetit thanë se për deputetët dhe ministra nuk mund të ketë verifikime pa pasur një kërkesë personale prej tyre. Deri më tani janë disa emra që kanë kërkuar verifikim, por shumica dërrmuese nuk e kanë bërë një gjë të tillë. Që kur u hartua ligji u deklarua se deputetët bënë një sërë ndryshimesh që t?i shpëtojnë verifikimit./Kliti TOPALLI