Cili është imazhi i politikanëve ?!

1 Mars 2018, 13:49, Aktualitet CNA

Politikanëve të të gjitha rracave, majtas apo djathtas, ka filluar tu hapet oreksi me padi nëpër gjykata, megjithëse në shumicë absolute, paditë e tyre janë rrëzuar, flasim këtu për ato padi që u janë drejtuar mediave, atyre tradicionale apo atyre on line.

Politikanët pretendojnë se kanë imazh dhe po ju cënohet nga shkrimet në media, por mjafton një sondazh publik, dhe nuk ka gjykatë në botë që dënon mediat.

Politikanët shqiptarë kanë imazhin e personave të korruptuar, imoralë, banditë. Mjafton të përdorim akuzat e të dyja palëve, ato që kanë thënë ata që sot janë në pushtet kur ishin në opozitë, dhe çfarë ju thotë atyre pala tjetër.

Ervin Salianji paditi CityNews sepse kishin thënë që ishte ortak me Henri Çilin. Nga çmenduria e politikanit dha një intervistë gjatë kohës që gjyqi kishte rreth 6 muaj që zhvillohej dhe në intervistë pranoi që kishte bërë biznes me Henri Çilin. Mjaftoi kjo dhe avokati, ndoshta shumë profesionist ngeli si ?presh? në Gjykatë. Klienti i tij tjetër kishte kërkuar kundër medias e tjetër thoshte publikisht. Gjykata e rrëzoi.

E përditshmja TEMA sot njofton se ka një padi në gjykatë për shkak të një shkrimi ndaj Grida Dumës, e cila pretendon se i është prishur imazhi. Ndoshta Grida ka të drejtë, por vetëm në rastin kur politikanët kanë imazh, këtu nuk bën përjashtim as Grida.

Ajo mund të jetë e bukur dhe sharmante, por është një politikane ashtu si dhe gjithë të tjerët. Është nga ato që humbi turpësisht në Durrës dhe ndoshta është e para Sekretare e Marrëdhënieve me Publikun që akuzon një media, qoftë ajo në opozitë me partinë e saj.

Ne nuk bëjmë avokatin e TEMA-s as nuk kemi ndërmend ta bëjmë atë, por kurrësesi nuk mund të bëjmë avokatin e politikanëve tanë të korruptuar, të lidhur me drogën e krimin, të lidhur me padi në gjykatë apo prokurori, politikanë që shkallët e karrierës i kanë ngjitur në mënyrë të dyshimtë. Grida është një nga ata.

Së fundi mund të themi se me hyrjen e Gridës dhe Salianjit në lista, PD ka 230 mijë vota më pak. Pra, hyrja e tyre duke hequr ca të vjetër nuk forcoi imazhin e PD-së, ku bën pjesë Grida dhe Ervini.

Imazhi i tyre në opinionin publik nëse duan ta dinë të vërtetën është i rrënuar për shkak se i përkasin një kaste politikanësh pa vlera dhe kontribute në politikë, që i ngjisin shkallët me shpejtësi të mbështetur nga klientelat e universiteteve private, se kandidojnë në lista se bëjnë kamikazin e kryetarit, por edhe sepse kanë me dhjetëra e dhjetëra gafa apo budallalliqe të thëna në opinionin publik, të cilat janë kthyer në rrjetet sociale në hite, që kanë thyer audiencën.

Tani kërkojnë dëm se kanë imazh. Në fakt ata që bëjnë dëmin e Shqipërisë janë politikanët, dhe nuk e kanë dëm kundër një personazhi apo një media, por dëm kundër Shqipërisë. Imazhi i tyre ka rrënuar Shqipërinë dhe fytyrën e saj kudo në botë, ndërsa ata pretendojnë se vërtetë kanë imazh.

Shfaqja pritet të vazhdojë. Show është edhe më i bukur tashmë. Politikanë me një imazh të rrënuar që kërkojnë dëm nga imazhi i tyre i prishur. Kjo ndodh në Shqipërinë tonë nga qesharakët e politikës, që përfaqësojnë shqiptarët në parlament./ CNA.al