Rishfaqet Armata e Veriut/ Kërcënon serbët e Forcës së Sigurisë me "thyerje kockash"

19 Shkurt 2018, 18:39, Kosova & Bota CNA

Nëpërmes një pamfleti, organizata serbe “Severna Armija” (Armata e Veriut) u ka bërë thirrje pjesëtarëve të Forcës së Sigurisë së Kosovës (FSK), të largohen nga kjo strukturë militare, përndryshe “do t’ua thyejnë kockat”.

Para një muaji, “Srpska” në Zubin Potok i ka porositur pjesëtarët serbë të FSK-së, se “të gjithë njerëzit e Kolashinit (Zubin Potokut) të cilët provojnë që të ardhmën e tyre ta kërkojnë në insitutucionin e Ushtrisë së Kosovës “do të leçitënnga populli Kolashinit”, raporton kosovarja “Zeri.info”.

Pamfleti me përmbajtje kërcënuese është shpërndarë në gjithë Zubin Potokun, ndërkohë që Policia e Kosovës është duke hetuar këtë rast.

“Jemi dëshmitarë të aspiratës së shqiptarëve për t’i përfshirë serbët nga Zubin Potoku në ushtrinë UÇK, ose FSK, në të njëjtën ushtri, e cila na ka vrarë fëmijë, gra dhe pleq në gjithë Kosovën. Nuk u lejojmë njerëzve të prishur të gjakut tonë, të cilët kanë pranuar këtë thirrje të jetojnë, punojnë dhe të jenë në Zubin Potok. Nuk do të lejojmë që atyre t’u ndihmojë komuna e Zubin Potokut në krye me kryetarin. Do t’ua thyejmë kockat. Ju ushtarë, takohemi shumë shpejt. Nuk mund t’u mbrojë as komuna, as policia”, thuhet mes tjerash në pamflet.

Zëvendësdrejtori i Drejtorisë Rajonale të Policisë së Kosovës në veri, kapiten Besim Hoti, ka thenë se policia është duke e hetuar këtë rast dhe se për të është njoftuar Prokuroria.

E ndërkaq, një muaj para shfaqjes së këtij pamfleti dhe të të ashtuquajturës “Armatë e Veriut”, Lista “Srpska” në Zubin Potok, pati ftuar të gjithë pjesëtarët e FSK-së të komunës së Zubin Potokut që të largohen nga FSK-ja, përndryshe, siç ishte kërcënuar “Srpska”, “do të leqiten nga populli i Kolashinit”.

Zubin Potoku, komuna me zhvillimin më të madh ekonomik, me strukturën më të rregulluar, me një zhvillim të hovshëm në bujqësi, turizëm dhe me potenciale ekologjike, thërret qytetarët e vet që fuqinë e tyre ta drejtojnë nga zhvillimi i rajonit tonë dhe të heqin dorë nga aleancat me ata që nuk na e duan të miren…”, thuhej ndër të tjera në një kumtesë për banorët e komunës së Zubin Potokut, të lëshuar nga Këshillit Komunal i Listës “Srpska” në Zubin Potok.

Forca e Sigurisë së Kosovës aktualisht ka 103 pjesëtarë të nacionalitetit serb. Në mesin e tyre ka edhe pjesëtarë të komunës së Zubin Potokut. Dhe pikërisht për këtë arsye, në fund të nëntorit të vitit të kaluar një bombë u hodh në shtëpitë e dy pjesëtari të FSK-së në Zubin Potok, ndërsa ishte bërë përpjekje për ta djegur edhe veturën e njërit prej tyre./CNA.al