E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Prokurorë dhe gjyqtarë drejt prangave/ Ja, si do të hetohen emrat që nuk kalojnë Vetingun

14 Shkurt 2018, 09:08, Aktualitet CNA

Shtohen telashet për gjyqtarët dhe prokurorët në vend. Emrat që nuk do e kalojnë procesin e vetingut, duket se nuk do ja hedhin vetëm me përjashtim nga gjyqësori.

Kur u hartua ligji i vetingut, u bë e ditur se ai nuk do të ketë si qëllim ndjekjen penale të gjyqtarëve dhe prokurorëve. Madje në ligj është vendosur që komisionet vetëm do të marrin vendim nëse një emër e kalon apo jo vetingun.

Kjo gjë i qetësoi të gjithë njerëzit e drejtësisë, pasi për habinë e të gjithëve rreth 800 persona vendosën të hyjnë në veting dhe në atë kohë vetëm 8 emra u larguan.

Personat e përfshirë në afera menduan se do ja hidhnin paq vetëm me largim nga drejtësia. Por në të vërtetë nuk do të ndodhë aspak kështu, pasi do ndiqen penalisht.

I pari që e bëri të ditur një gjë të tillë ishte ambasadori amerikan Donald Lu, i cili deklaroi se për Adriatik Llallën do të ketë hetim penal. Por duket se fatin e Adriatik Llallës do ta kenë të gjithë emrat që ngecin në procesin e vetingut për shkak të mosjustifikimit të pasurisë, apo abuzimeve me vendimet.

Një gjë e tillë u bë e ditur dje në Këshillin e Legjislacionit, ku deputetët deklaruan se vetingu nuk arreston njeri, por është detyrë e organeve të tjera të marrin masa për emrat që zbulohen me shkelje. Gazeta ka arritur të zbardhë skenarin që do të ndiqet sapo të dalin rezultatet e para të vetingut. Në bazë të ligjit të vetingut, Komisioni i Pavarur i Kualifikimit nuk mund të bëjë kallëzime, por një gjë të tillë mund ta bëjnë organet mbështetëse të tij, si ILDKP dhe Drejtoria e Pastrimit të Parave.

Një anëtar i ish-komisionit të reformës në drejtësi i tha gazetës se në momentin që Komisioni i Vetingut zbulon se një gjyqtar e prokuror nuk e justifikon pasurinë dhe ka prova të mjaftueshme se ai ka abuzuar me detyrën, atëherë së pari është prokuroria që nis hetimet kryesisht.

KPK do të bëjë publik faktet në media dhe në bazë të tyre organi i akuzës sipas ligjit për prokurorinë, duhet të nisë menjëherë hetimet, siç ndodhi në rastin ?Tahiri?, pasi hetimet nisën mbi bazë të medieve. Në ligjin vetingut është deklaruar se kushdo që nuk deklaron të dhëna të sakta, akuzohet për falsifikim formulari, siç ka ndodhur me rastin e dekriminalizimit. Më pas hetimet thellohen dhe për të zbuluar shkeljet në detyrë.

Roli i institucioneve shtetërore

Duke qenë se Komisioni i Pavarur i Kualifikimit nuk bën dot kallëzime, në lëvizje do të vihen Inspektorati i Lartë i Deklarimit dhe Kontrollit të Pasurive dhe Drejtoria e Përgjithshme e Parandalimit të Pastrimit të Parave. Sipas ligjit të deklarimit të pasurisë dhe atij për pastrimin e parave, këto institucione janë të detyruar të bëjnë kallëzime penale nëse zbulojnë shkelje nga zyrtarët.

Në rastin e ILDKP, nëse zbulohet se gjyqtarë e prokurorë kanë mashtruar me deklarimin e pasurive, atëherë ata do të duhet që të ndiqen penalisht.

Ndërkohë sipas burimeve, DPPPP është duke përgatitur që tani dosjet e kallëzimeve. Edhe ky institucion detyrohet nga ligji që të bëjë kallëzim penal në prokurori kur zbulon se ka transferta të dyshimta apo pastrim parash. Pra ndërkombëtarët duket se kanë ecur me plan të mirëmenduar. Edhe pse u tha se vetingu nuk do të shërbejë për ndjekje penale, nuk do të jetë aspak kështu.

Kushdo që ka vjedhur paratë e popullit dhe nuk e justifikon dot pasurinë, do të kalojë në ndjekje penale. Numri pritet të shkojë me qindra. Në mbledhjen e fundit të KLD anëtari Gjin Gjoni ka deklaruar se shqiptarët presin largimin e rreth 80 për qind të gjyqtarëve nga sistemi. Nëse do të jetë e vërtet kjo shifër, atëherë SPAK do të ketë shumë punë për të bërë dhe me qindra persona rrezikojnë burgun./Sot