E fundit!

10:51 Aktualitet

Helmimi i kursantëve te Akademia e Sigurisë/ Reagon Policia e Shtetit

Në orët e mbrëmjes së djeshme dhe në orët e para të mëngje...

Zbardhet raporti i DASH/ Amerikanët kërkojnë goditje të krimit dhe pastrimit të parave

28 Janar 2018, 11:51, Aktualitet CNA

Krimi, korrupsioni dhe pastrimi i parave vijojnë të shihen si probleme nga SHBA në vendin tonë. Së fundmi Byroja Diplomatike e SHBA, pjesë e Departamentit Amerikan të Shtetit ka nxjerrë raportin për vitin 2018 mbi sigurinë në Shqipëri.

Çdo vit Byroja Diplomatike (OSAC), përgatit një material për të gjithë shtetasit amerikan që jetojnë në vende të ndryshme, përfshirë këtu edhe Shqipërinë, ku shpjegohen rreziqet që u kanosen atyre.

Gazeta ?SOT? ka siguruar dokumentin e plotë, ku janë evidentuar edhe problemet kryesore të vendit tonë. Konkretisht, ndër pikat kryesore që DASH i ka cilësuar si problematike janë krimi i organizuar dhe pastrimi i parave. Sipas raportit, në Shqipëri është shqetësim serioz fakti që rrjetet e krimit vijojnë operojnë në vend.

?Krimi i organizuar vazhdon të mbetet një shqetësim serioz për shumicën e shqiptarëve teksa rrjetet e krimit të organizuar drejtojnë trafikun e drogave, gjobat, zhvatjet, ryshfetet, pastrimin e parave, prostitucionin dhe trafikun njerëzor. Statistika të kohëve të fundit tregojnë për shumë incidente të dhunshme të kategorive tentativë vrasjeje, grabitje me dhunë, dhe grabitje të armatosura.

Vizitorët në Shqipëri këshillohen të mos bëjnë rezistencë por të plotësojnë kërkesat nëse konfrontohen me sulmues të armatosur. Komunitetet e huaja nuk shënjestrohen qëllimisht, por mund të jenë viktima prej rrethanave të caktuara ose afrimitetit me vendasit. Në debatet personale mes shqiptarëve përdoret presioni me anë të armëve ose të shtëna ndaj bizneseve ose rezidencave?, shkruhet në raport.

Korrupsioni

Një tjetër pikë ku e vë theksin DASH është edhe fenomeni i korrupsionit. Në raportin vjetor të Byrosë Diplomatike thuhet se policia jonë ende përballet me këtë fenomen, teksa theksohet se shkaqet për këtë shpeshherë janë edhe mungesa e njerëzve.

Amerikanët shtojnë se edhe pagat e ulëta të uniformave blu përbëjnë rrezik për korrupsion, por vijojnë më tej duke shpjeguar se kapacitetet e policisë janë drejt përmirësimit. ?Korrupsioni dhe mungesa e burimeve mbeten sfidat kryesore të policisë. Institucionet e rendit dhe sigurisë në vend janë përmirësuar vitet e fundit.

Policia zakonisht reagon disi më shpejt kur kontaktohet nga anëtarë të komunitetit të huaj. Një nga shqetësimet për performancën e dobët të policisë janë rrogat e ulëta dhe mundësia e korrupsionit. Por kapacitetet e policisë po përmirësohen, veçanërisht në fushën e anti-terrorizimit dhe trajnimit në krimin e organizuar?, thuhet në raport.

Përmes këtyre evidentimeve për krimin e organizuar, pastrimin e parave dhe korrupsionin, amerikanët po përçojnë edhe një mesazh se këto fenomene duhen goditur në mënyrë që të garantohet siguria e të gjithëve në vend.

Ambasadorët

Mirëpo interesant është fakti se në raportin e këtij viti, OSAC i ka kushtuar rëndësi edhe sulmeve që bëhen ndaj diplomatëve të deleguar në Shqipëri.

Ndryshe nga vitet e tjera ku ky shqetësim nuk ishte i pasqyruar, këtë herë raporti thekson se dhuna politike ndaj zyrtarëve të SHBA është në nivel të mesëm.

?DASH e vlerëson Tiranën me nivel të mesëm mbi sulmet dhe dhunës politike drejtuar zyrtarëve apo interesave të SHBA?, theksohet aty. Duhet theksuar se ky konstatim i amerikanëve vjen pas sulmeve të njëpasnjëshme dhe të shpeshta që opozitarët Monika Kryemadhi, Lulzim Basha apo edhe Petrit Vasili u kanë bërë ambasadorëve, duke e konsideruar këtë si një shqetësim.