Akuzat e PD ndaj Policisë së Shtetit/ Reagon ministria e Brendshme

16 Janar 2018, 17:37, Aktualitet CNA

Pas akuzave të bëra nga Partia Demokratike drejtuar Policisë së Shtetit, për të cilën shprehet se nuk po i nënshtrohet vetingut dhe se punonjës të caktuar të saj janë pjesë e krimit të organizuar, ka reaguar edhe Ministria e Brendshme.

Me anë të një komunikate për shtyp, Ministria e Brendshme hedh poshtë akuzat e opozitës lidhur me rastin e efektivit të policisë të denoncuar dje në një emision investigativ, ku bënte pazar me kokainë. Sipas ministrisë, punonjësi në fjalë është Julian Balliu, i cili është pezulluar nga detyra dhe është shpallur në kërkim.

Në reagimin e ministrisë thuhet se, ?Ky është treguesi më i qartë se aktualisht në Policinë e Shtetit nuk ka më të paprekshëm, apo të mbrojtur në ?çadrën? partiake, ashtu siç tregon vullnetin e qartë për pastrimin e radhëve nga çdo efektiv që shkel ligjin.?

Komunikata e plotë i Ministrisë së Brendshme:

Ministria e Brendshme, përmes Shërbimit për Çështjet e Brendshme dhe Ankesat (SHÇBA) dhe Policisë së Shtetit reaguan menjëherë mbrëmë pas publikimit të pamjeve në emisionin investigativ ?Fiks Fare?, duke pezulluar dhe shpallur në kërkim oficerin e dyshuar si të implikuar në këtë vepër penale.

Hetimet e plota nisën menjëherë nga SHÇBA në bashkëpunim me Prokurorinë.
Ky është treguesi më i qartë se aktualisht në Policinë e Shtetit nuk ka më të paprekshëm, apo të mbrojtur në ?çadrën? partiake, ashtu siç tregon vullnetin e qartë për pastrimin e radhëve nga çdo efektiv që shkel ligjin.
Ministria e Brendshme siguron qytetarët se, askush dhe për asnjë motiv, nuk do mund të ndryshojë vullnetin, për të luftuar krimin dhe goditur korrupsionin. Përpjekjet tona për konsolidimin e shtetit të së drejtës nuk do ndalen. Vetting-u në Policinë e Shtetit, i mbështetur fuqimisht nga partnerët ndërkombëtarë, është një mekanizëm ligjor që do ta përshpejtojë procesin. Vetting-u do të reformojë kapacitetet njerëzore në Policinë e Shtetit, duke promovuar pjesën më të shëndetshme, punonjësit më me integritet, të trajnuar, të mirë arsimuar, të cilët janë shumica në organizatë.
Duke përfituar nga rasti, i bëjmë thirrje PD-së të heqë dorë nga dhuna verbale ndaj Policisë së Shtetit, e të punojmë bashkë për ta bërë vendin dhe jetën e qytetarëve më të sigurt. /CNA.al