PD reagon për shkarkimin e Rovena Gashit: Hakmarrje e Ramës për Aqif Rakipin/ Basha “harron” deputetin e LSI

29 Dhjetor 2017, 13:40, Aktualitet CNA

Partia Demokratike ka reaguar në lidhje me shkarkimin e prokurores Rovena Gashi, duke e cilësuar si hakmarrje të kryeministrit Rama për deputetin Aqif Rakipi.

Në një deklaratë për mediat, PD shprehet se Rama ka urdhëruar shkarkimin e Rovena Gashit, dy ditë pasi, në zbatim të ligjit të dekriminalizimit, ajo i kërkoi Komisionit Qendror të Zgjedhjeve ndërprerjen e mandatit për deputetin e Elbasanit, Aqif Rakipi.

Në këtë reagim, Basha e tregoi edhe një herë tjetër që kemi një opozitë hipokrite.

Shumë mirë që reagon për shkarkimin e një prokurorje, por ai ka ?harruar? ose bën sikur që në fakt janë dy deputetë për të cilët është kërkuar ndërprerja e mandatit, është Aqif Rakipi i PDIU si dhe Gledjon Rehovica i LSI.

Ndërsa në deklaratën e PD, nuk përmendet deputeti i LSI, Rehovica, por vetëm deputeti Rakipi.

Deklarata e plotë e PD:

Kapja politike e Prokurorit të Përgjithshëm nga Edi Rama, pasi kthimit të pasaportës për Saimir Tahirin, dha sot një tjetër efekt.

Kryeprokurori Edi Rama shkarkoi drejtuesen e Sektorit të Dekriminalizimit në Prokurorinë e Përgjithshme, Rovena Gashi, dy ditë pasi, në zbatim të ligjit të dekriminalizimit, zonja Gashi i kërkoi Komisionit Qendror të Zgjedhjeve ndërprerjen e mandatit për deputetin e Elbasanit, Aqif Rakipi.

Shkarkimi i prokurores Rovena Gashi, e cila e drejtoi Sektorin e Dekriminalizimit që në krijimin e tij, është hakmarrje direkte e Edi Ramës për llogari të aleatit dhe mikut të tij, Aqif Rakipi.

10 ditë pas emërimit politik të Prokurorit të Përgjithshëm, në shkelje të hapur me Kushtetutën, u faktua mashtrimi i madh i Edi Ramës, argumenti kryesor i të cilit ishte se Prokurori i Përkohshëm nuk kishte asnjë kompetencë thelbësore për të lëvizur prokurorët apo për të ndikuar në mbylljen e dosjeve.

Skema e Edi Ramës në mbrojtje të aleatëve të tij kriminelë është e qartë.

Kur drejtësia kërkon arrestimin e Saimir Tahirit, Edi Rama e kap drejtësinë, kur ligji zbatohet për të larguar kriminelët nga parlamenti, Edi Rama godet ata që zbatojnë ligjin.

Që sot, me shkarkimin e prokurores Rovena Gashi si hakmarrje për Aqif Rakipin, krimi ka filluar të godasë shtetin përmes shtetit!?/ CityNews