web counter
LEXO PA REKLAMA!

SHKARKO APP

App Store
Google Play

E fundit!

x

Koha që PD t’i rimarrë votat e shkuara te LSI

27 Dhjetor 2017, 20:40, Aktualitet CNA

Nga Mero Baze

Ka shumë zëra që kritikojnë një koalicion të mundshëm afatgjatë mes Partisë Demokratike dhe LSI-së, si të pafavorshëm për PD. Këtë e thonë jo vetëm kritikët e kryetarit të PD nga brenda PD, por dhe shumë komentatorë politikë, të cilët e mbështesin arsyetimin e tyre më shumë mbi baza morale. Por një vështrim më i ftohtë i pozicionit të ri të LSI, mund të ndryshojë këtë histori në favor të PD-së, edhe pse larg të bërit atë fituese.

Në fakt, një aleancë afatgjatë mes PD dhe LSI, është rruga më e dobishme për Partinë Demokratike për të rigjeneruar fuqinë e saj të humbur nga baticat dhe zbaticat në raport me LSI.

Pozicioni i tanishëm politik i LSI është momenti më i favorshëm që PD ta afrojë atë në koalicion, pasi kështu mund të rithithë brenda vetes shumë njerëz që shkuan prej saj në LSI më 2013, kur LSI ndoqi një politikë të butë ndaj ?tradhtarëve? të PD që donin të vazhdonin të ishin në pushtet, dhe me koalicionin LSI-PS.

Falë një politike të butë dhe përthithëse të Ilir Metës për këtë kategori, PD u rrënua në zgjedhjet e 2015-së dhe po ashtu pati hemoragji të fortë në zgjedhjet e 2017. LSI vetëm u rrit dhe mbrojti elektoratin e saj më 2017.

Sot LSI ka një qasje të re politike. Ajo nuk është më partia që qëndron në mes, që përthith faktorë lokale elektoralë  të PD apo të PS.

Sot LSI është parti radikale, me qëndrime të forta ndaj PS-së, biles shumë më të forta se të PD. Ajo po identifikohet përditë, si një parti e armiqësuar me PS për punët e veta, me qëndrime politike shpesh anormale dhe me një fjalor politik vulgar.

Kjo gjuhë politike e LSI, bën që askush nga PS të mos orientohet më nga LSI dhe të konsolidohet një armiqësi politike mes tyre, që i jep fund rrjedhjes së votave nga e majta, dhe çarjes së re të mundshme të së majtës.

Por nga ana tjetër, ky është një opsion që mund të rrisë Partinë Demokratike, pasi tani është ajo që mund të marrë votat e ikura tek LSI. Unifikimi i LSI me qëndrime ekstreme lë pak hapësirë për rolin e  vjetër të saj si parti mes dy partive të mëdha, dhe i jep shans shumë demokratëve që kanë pas shkuar tek LSI të rindjehen si në shtëpinë e tyre sërish në PD.

Ata që kritikojnë këtë koalicion kanë të drejtë në faktin se nuk mund të jetë fitues, por një riorganizim votash benda opozitës, do të rrisë PD dhe do zvogëlojë LSI. Në këtë aspekt, Basha mund të ketë interesin e vet, pasi në zgjedhjet e ardhshme mund të marrë rezultat më të mirë se në këto zgjedhje, por jo fitues. Të paktën mund të ketë shansin të thotë se filloi ndryshimi. /TemA





Lajmet e fundit nga