Pakt për zgjedhjen e kryeprokurorit?/ Ish-presidenti tregon Kushtetutën

7 Dhjetor 2017, 13:39, Aktualitet CNA

Në lidhje me ftesën e kryeministrit Rama ndaj kreut të PD, Lulzim Basha për pakt për zgjedhjen e Prokurorit të Përgjithshëm, ka reaguar edhe ish-presidenti Bujar Nishani.

Bujar Nishani, nëpërmjet një postimi në rrjetet sociale i ka kërkuar disa sqarime kryeministrit Edi Rama.

Ndër të tjera, Nishani i kërkon Ramës të sqarojë se përse opozita u përjashtua nga takimi i Këshillit të Asociim-Stabilizimit në Bruksel si dhe deklaratat e tij se Shqipëria mund të orientohet drejt Rusisë dhe Kinës.

Nishani thotë se zgjidhja për Prokurorin e ri të Përgjithshëm është parashikuar nga Kushtetuta, ?e zeza mbi të bardhë, që nuk e lëviz as topi dhe asnjë ndërkombëtar.

?Kushtetuta e Shqipërisë Neni 179/13 citon ?Deri në zgjedhjet parlamentare, që do mbahen pas hyrjes në fuqi të këtij ligji, por jo më vonë se data 1 shtator 2017, zgjedhja e Inspektorit të Lartë të Drejtësisë dhe e Prokurorit të Përgjithshëm do bëhet me dy të tretat e anëtarëve të Kuvendit (94 vota). Zgjedhjet e tjera do të bëhen me tri të pestat e anëtarëve të Kuvendit (84 vota)??, shkruan nishani.

Postimi i plotë i Bujar Nishanit:

Kurthi i Kryeministrit ndaj opozitës.
Rrugëtimi evropian e Shqipërisë është projekti i shekullit për shqiptarët. Megjithëse një Komb Evropian aq i vjetër sa vetë Evropa, shqiptarët janë luftuar, izoluar, u janë ngritur kurthe, janë përçarë, grabitur territore, lënë në varfëri, atrofizuar në raport me lirinë, civilizimin dhe kulturën perëndimore, historikisht.

Por, ky shekull ka nisur krejt ndryshe nga e shkuara për shqiptarët. Liria ekonomike është një mundësi për ta. Shqipëria është anëtare e NATO-s. Shqiptarët lëvizin të lirë pa viza në Evropë. Integrimi Evropian mbetet ëndrra ende e parealizuar e shqiptarëve, por e vetmja alternativë e tyre për të ardhmen.

Politikisht ky mund të jetë vetëm një proçes, një angazhim, një kontribut gjithpërfshirës. Në këtë kontekst çdo iniciativë për angazhim gjithpërfshirës ka sens mëse normal. Por thirrja formale e Kryeministrit të vendit ndaj opozitës për pakt për integrimin dhe zgjedhjen e Prokurorit të Përgjithshëm, më së pari ka nevojë për disa sqarime publike nga Kryeministri i vendit.
Së pari, pse u përjashtua dhe anatemua politikisht opozita nga takimi i fundit i Këshillit të Asociim Stabilizimit në Bruksel?

Së dyti, Kryeministri duhet të sqarojë për opinionin qëndrimin e tij politik më të fundit se Shqipëria mund të orientohet drejt Rusisë dhe Kinës nëse nuk hapen negociatat e BE me vendin. Kjo duhet të jetë një kambanë alarmi për opozitën e cila ka lindur në këtë vend dhe ka ekzistuar si orientuese e Shqipërisë drejt perëndimit. Pa e sqaruar këtë pozicionim të ri politik të qeverisë aktuale, opozitës shqiptare do t?i vihet në dyshim përkatësia, gjithashtu.

Proçesi i Prokurorit të Përgjithshëm kërkon veçse zbatimin korrekt të Kushtetutës.
Prokurorit të Përgjithshëm i ka mbaruar mandati. Më datën 8 dhjetor Prokurori aktual i Përgjithshëm nuk mund të hyjë më në zyrën e këtij institucioni. Ky moment kërkon zgjedhjen e një prokurori të ri. Ky proçes duhet të shkoj vetëm sipas përcaktimeve kushtetuese./ CityNews