107 vjet burg për të akuzuarit e masakrës së Mamurrasit

16 Nëntor 2017, 15:05, Aktualitet CNA

Prokuroria e Kurbinit ka kërkuar plot 107 vjet burg për 4 të akuzuarit për masakrën e Mamurrasit, ku një person humbi jetën dhe 2 të tjerë mbetën të plagosur.

Ngjarja në fjalë ka ndodhur më 23 shtator të 2015-ës, ku kushërinjtë Gazmir dhe Taulant Tafa janë konfliktuar me njëritjetrin duke përdorur edhe armët, e për pasojë mbati i vdekur Naim Tafa, i cili gjithashtu ishte pjesë e konfliktit. Të plagosur në këtë koflikt, mbetën Idriz Tafa dhe Altin Çoku, të cilët gjendeshin rastësisht në vendin e ngjarjes tek stacioni i trenit.

Për këtë ngjarje, Prokuroria e Kurbinit ka kërkuar 107 vite burg për 4 të akuzuarit për këtë ngjarje.

Përkatësisht:

1.Tom Mamli të dënohet me 33 vjet burgim
2.Elton Mamli të dënohet me 26 vjet burgim
3.Gazmir Tafa të dënohet me 24 vjet burgim
4.Taulant Tafa të dënohet me 24 vjet burgim

Në sqarimet e Prokurorisë për hetimet rreth ngjarjes thuhet:

Konflikti ndërmjet familjeve Tafa dhe Mamli ka filluar kohë më parë në Suedi, ku janë përplasur fizikisht për motive të dobëta kushëriri i të pandehurve Tafa, Edmond Tafa me vëllezërit Mamli. Ky konflikt ka vijuar edhe në Shqipëri. Rreth një muaj para ngjarjes, i dëmtuari në Suedi, Edmond Tafa dhe i pandehuri Gazmir Tafa kanë rrahur në Mamurras Elton Mamlin. Pas kësaj ngjarjeje, vëllezërit Mamli kanë debatuar edhe me kushëririn e tyre, Dorjan Mamli, për faktin se ky i fundit shoqërohej me Tafajt, të cilët ishin ?kundërshtarët e tyre?. Por, pavarësisht presionit, Dorjan Mamli nuk ka pranuar të shkëpusë marrëdhëniet me Tafat dhe për këtë arsye, ditën e ngjarjes, më 23 Shtator 2015, vëllezërit Elton dhe Tom Mamli kanë rrahur kushëririn e tyre, Dorjan Mamlin. Pas këtij episodi, vëllezërit Mamli janë larguar me mjetin e tyre Range Rover. Ndërsa Dorjan Mamli është takuar me kushërinjtë Tafa, të cilëve u ka treguar për ngjarjen. Këta të fundit (Tafat) kanë dalë me mjetin e tyre, tip ?Benz?, në kërkim të vëllezërve Mamli.

Të dy palët janë përballur me njëri-tjetrin pranë stacionit të Trenit dhe fillimisht kanë përplasur mjetet e tyre në mënyrë të drejtëpërdrejtë. Pas përplasjes, të dy palët, të armatosur, kanë dalë nga mjetet dhe kanë qëlluar kundër njëri-tjetrit. Konflikti i armatosur ka ndodhur në një moment, kur ambjenti përreth ka qenë i populluar me shumë njerëz. Nga goditjet me armë, ka mbetur i vdekur në vend shtetasi Naim Tafa, i cili gjendej nën shoqërinë e kushërinjve Tafa. Nga ekspertiza, rezulton se ai është vrarë nga arma e përdorur nga Tom Mamli. Po ashtu, nga goditjet me armë, kanë mbetur të plagosur edhe shtetasit Idriz Tafa dhe Altin Çoku, të cilët gjendeshin rastësisht në vendin e ngjarjes.