Situata e PS-së ka vetëm një të fituar, Erion Veliaj

6 Nëntor 2017, 23:40, Aktualitet CNA

-Nga Alban DACI

Situata aktuale në PS-në ngjan me situatën e sovjetëve, në vitin 1924 pas vdekjes së liderit dhe revolucionarit Lenin. Situata brenda PS-së është shumë më e rëndë se sa situata që mendohet mes Opozitës dhe PS. Kjo e fundit po kalon një periudhë shumë të vështirë të brendshme, të shoqëruara nga situata e frikës, humbjes, trashëgimisë dhe paranojës se çfarë do të ndodh meta. Nëse Opozita ka optimizmin se mund të fitojë, dhe kjo është një ndjenjë pozitive dhe optimiste, përfaqësuesit e PS-së po shoqërohen gjatë gjithës kohës me paranojën se do të humbin dhe çfarë do të ndodh me ta?Pra, përfaqësuesit e PS kanë një pasiguri të madhe për të ardhmen e tyre dhe po ashtu jetojnë me ujërat e trazuar. Nëse Opozita shpreson vetëm tek fitorja se s?ka çfarë humbet më, PS është me paranojën e frikës se vetëm humbja nuk do të mjaftojë për ta dhe po ashtu nuk janë të sigurt se çfarë do të humbasë dhe deri ku do të shtrihet humbja e tyre.

Nga 2013 deri më sot, protagonizmi absolut i Ramës, jua ka lehtësuar punën drejtuesve të tjerë të PS e sidomos atyre që kanë preferuar të qëndrojnë në prapavijë dhe të mos kenë përgjegjësi direkte. Nëse deri para ca kohësh kishte personalitete të rëndësishme tek PS-ja që ishin të mërzitur për faktin se Rama nuk u kishte dhënë përgjegjësi institucionale mbi shpatulla, që nën kuptohet poste ministrore, ata sot janë shumë të lumtur që nuk janë bërë pjesë e protagonizmit dhe përgjegjësisë që Qeverive të Ramës. Madje, në këto ditë, nëse do të kishte krizë qeveritare, zor se do të kishte personalitete që do të pranonin të bëheshin ministra dhe të zëvendësonin kolegët e tyre.

Sot, Rama mund të konsiderohet politikisht i vdekur, ose më saktë është pranë një vdekje politike të sigurt, sepse ka qeverisur me aq shumë arrogancë kundrejt qytetarëve dhe Opozitës, sa nuk nëse do të rrëzohet nuk do i jepet një shancë i dytë. Madje, Rama me stilin e tij prepotentë ka bërë armiq të heshtur edhe në radhën e partisë së tij, të cilët me momentet e para që do të shikojnë dobësimin e liderit të tyre, nuk do e mbështesin atë, por do e shtyjnë akoma më shumë që të ketë një rrëzim të përshpejtuar dhe të sigurt.

Unë, besoj dhe jam i sigurt që Rama do të rrëzohet nga brenda dhe ky rrëzim do të jetë më i egër dhe i dhimbshëm për të, sesa nëse do të rrezohet nga Opozita apo nga operacionet qytetare. PS-ja ka një histori të pasur rrëzimesh, komplotesh të brendshme në momente decisive, Nano me Metën, Majko me Metën, Rama me Nanon, Rama me Blushin, Blushi me Malaj, etj. Në të gjitha këto eksperienca, kur kriza është serioze brenda PS-së gjithmonë shoqërohet me eliminime të mirëfillta politike dhe me aksion që nuk kanë kthim mbrapa.

Rama, në këto momente është në situatën e Leninit në 1924, me një dallim të madh, sepse Lenin kishte vdekur fizikisht, por jo politikisht, ndërsa Rama ka vdekur politikisht dhe vazhdon të jetojë fizikisht. Ekzistenca fizike e Ramës si lider brenda PS-së është një problem për pasardhësit e tij që presin nga momenti në moment rrëzimin e tij për të marr trashëgiminë. Pra, Rama nuk do të rrëzohet me komplote, por as nuk do të mbrohet brenda PS-së që ai të qëndrojë në këmbë. Kjo e lehtëson më shumë përgjegjësinë e drejtuesve të tjerë të PS-së, sepse me protagonizmin e tij absolutë, Rama, të gjitha të mirat apo të këqijat i mban mbi shpatulla, si suksesin ashtu dhe dështimin.

Në situatën aktual të PS-së të shoqëruar nga parajona dhe misteri se çfarë i pret në rast humbje, ka edhe një fitues dhe ky padyshim është Erion Veliaj. Pse? Së pari fati i tij e deshi, që rivali kryesor i tij për të trashëguar pushtetin e Ramës, Saimir Tahiri të rrënonte njëherë e mirë mundësinë e tij për të vazhduar ngjitjet e karrierës politike dhe institucionale. Pak rëndësi ka çfarë mund të ndodh me drejtësinë, por politikisht në situatat aktuale që ndodhet dhe po shkon Shqipëri, Tahiri e ka mbyllur ciklin e tij për të pasur një karrierë të rëndësishme politike tek PS apo në çdo formacion tjetër politik në Shqipëri.

Erion Veliaj, ka akoma edhe dy vite të tjera pushtet dhe do të vazhdojë të jetë personi i vetëm brenda PS-së që do të ketë pushtet, që do të ketë mundësi të mbaj afër miq, militantë dhe t?i kënaq ata me privilegjet e pushtetit apo me interesa që rrjedhin prej tij. Gjithashtu, Erion Veliaj e ka kuptuar shumë mirë se timoni që ka Rama në dorë po e fundos anijen që drejton ai dhe për këtë arsye është distancuar duke mbajtur një pozicion neutral.

Erion Veliaj, ka më shumë se nja muaj që nuk bën më politikë, nuk bën më propagandë, që nuk bën më replika, që nuk identifikohet më me Ramën, që nuk ka thënë asnjë fjalë për Tahirin. Pra, duket se Veliaj, ka zgjedhur të zbresë nga anija që drejton Rama dhe të ndalojë në ishullin e parë më të afërt. Veliaj nuk ka më nevojë për Ramën dhe po ashtu as për ministrat e tij. Veliaj, është pretendenti kryesor dhe trashëgimtari i vetëm për të marrë në drejtim PS-së, pasi Rama të fundoset me anijen e tij të mbushur me bashkëpunëtorët më të ngushtë. Veliaj po punon për PS-në e re që do të jetë pas Ramës dhe siç duket koha është në favorin e tij. Posti i Kryetarit të Bashkisë e bën të ndjehet komod dhe të pres momentin e duhur për të bërë lëvizjen e duhur.