Operacioni “Taurus”/ Policia greke asgjeson bandën e klandenstinëve, 11 shqiptarë

7 Nëntor 2017, 19:37, Aktualitet CNA

Policia greke ka asgjesuar një grup kriminal greko-shqiptar që trafikonte klandestinë nga vendet e Lindjes së Mesme drejt shteteve evropiane.

Lajmi i sjellë në shqip nga tv-Klan, thotë se në mes njëzetë të arrestuarve, njëmbëdhjetë janë shtetas shqiptarë. Kalimin e klandestinëve në destinacion banda e kryente duke prodhuar dokumente false të një cilësie të lartë. Policia ka zbuluar se si bashkëpunëtor në aktivitetin kriminal të trafikut të klandestinëve shërbenin disa zyrtarë të Shërbimit të Zyrës së Përkthimit në Ministrinë e Jashtme të Greqisë.

Duke raportuar për rastin, e përditshmja greke ?Kathimerini? shkruan se hetimi për këtë grup ka filluar në Korrik 2016 dhe ka zgjatur deri më 1 Nëntor 2017, që është dhe përmbyllja e aksionit policor. Në aksion morën pjesë më shumë se nëntëdhjetë punonjës të Drejtorisë së Policisë së Athinës.

Operacioni u kodua ?Taurus? (?Demi?) për shkak se një 64-vjeçar grek anëtar kryesor i bandës, vepronte në një zonë në Athinë me të njëjtin emër. Prej këtej filluan indiciet për hetimin. Autoritetet thanë se ky rrjet trafikimi funksiononte si një kompani e mirëfilltë, por e fshehtë për shkak të aktivitetit kriminal që kryente.

Nga hetimi është zbuluar se itinerari i trafikimit të klandestinëve ishte nga Greqia përmes aeroportit ?Venizelos? në Athinë, për në Gjermani e Britani të Madhe, dhe për transportimin e tyre kujdeseshin shqiptarët. Klandestinët ishin pajisur me dokumente të falsifikuara dhe përzgjidheshin me kritere shumë specifike.

Policia greke thotë se ishte një parakusht që klandestinët ta njihnin mirë Greqinë dhe ngjyra e tyre e lëkurës nuk duhet të ishte shumë e errët në mënyrë që të mos krijonin dyshime gjatë kontrollit në aeroport. Kostoja e udhëtimit ilegal varionte nga 2250 deri në 4500 Euro. Hetimet e policisë greke janë zhvilluar në bashkëpunim me policinë europiane, Europol.

Si kreu i kësaj organizate të trafikut të klandestinëve është identifikuar një 54-vjeçar shqiptar, i njohur në mesin e bashkëpunëtorëve me epitetet ?xhaxhai? dhe ?kryetari?. Anëtarët e bandës përdornin fjalë të koduara për veprimtarinë e tyre kriminale.

Sipas të dhënave të policisë së Athinës, ky rrjet kishte dërguar në Gjermani 250 ?klientë?, ndërsa në Britani të Madhe 45 persona.