Pedagogët frenojnë ngritjen e dy institucioneve të reja të drejtësisë

19 Gusht 2017, 08:07, Aktualitet CNA

Ndryshe nga vetingu, i cili do të nisë në shtator, ngritja e Këshillit të Lartë Gjyqësor dhe i Këshillit të Lartë të Drejtësisë po has në pengesa. Procesi i përzgjedhjes së anëtarëve të këtyre dy organeve ka nisur që në fillim të këtij viti, mirëpo ende nuk janë përzgjedhur gjysma e tyre, raporton ?Sot?. Sipas tw cilës, deri tani janë përzgjedhur kandidatë nga avokatia, shoqëria civile dhe Shkolla e Magjistraturës, ndërkohë që po haset vështirësi me përzgjedhjen e përfaqësuesve nga pedagogët, gjyqtarët dhe prokurorët.

Sa i takon pedagogëve, Kuvendi ka rihapur garën dhe sipas burimeve sërish ka një nivel të ulët të interesuarish. Por problemi më i madh që shihet është te gjyqtarët dhe te prokurorët. Sipas ligjit, mbledhja e Gjyqtarëve dhe Këshilli i Prokurorisë do të duhet që të zgjedhin nga 6 përfaqësues për në KLGJ dhe në KLP.

Duke ju referuar burimeve pranë Gjykatës së Lartë dhe Prokurorisë së Përgjithshme, të cilat vendosin për thirrjen e dy organizmave. Gazeta raporton se ky proces nuk dihet se kur do të ndodhë. Sipas informacioneve të marra, gjyqtarët dhe prokurorët janë me pushime dhe kthehen më 28 gusht, por deri më tani nuk ka akoma një datë se kur do mblidhen Konferenca Gjyqësore dhe Këshilli i Prokurorisë.

Ndërkohë, nga burime jo zyrtare, mësohet se ky proces mund të ndodhë në fund të muajit shtator, pasi po pritet dhe konstituimi i Kuvendit, i cili do ketë rol në këtë proces. Sipas ligjit, Kuvendi mund të kërkojë të mblidhen këto dy organizma dhe burime pranë deputetëve të PS deklaruan për gazetën se nëse nuk zgjidhen 12 gjyqtarët dhe prokurorët, atëherë do jetë Kuvendi që do kërkojë të bëhet mbledhja e gjyqtarëve dhe e prokurorëve.

Vonesa e KLGJ dhe e KLP rrezikon të fusë në ngërç sistemin e drejtësisë. Nëse emrat përzgjidhen në fund të shtatorit, funksionimi i KLGJ dhe KLP mund të nisë vetëm në fund vitit. Por këto dy organe janë kryesore për emërimin dhe shkarkimin e gjyqtarëve dhe prokurorëve dhe pa to situata vështirësohet. Por më e rëndësishmja është se pa KLGJ e KLP nuk ngrihet dot SPAK. Shenjat janë se shtatori do jetë muaji vendimtar sa i takon reformës.