Nga Flamur KUÇI/ E keqja që i vjen PD-së nga sundimi i Bashës

22 Korrik 2017, 18:12, Aktualitet CNA

Megjithëse Basha është para një rizgjedhjeje të sigurtë pa garë brenda PD-së, ka disa të vërteta që duhen thënë në lidhje me sundimin e tij.

Ka një mijë arsye pse Basha nuk duhet të jetë kryetar i PD. Ai erdhi në krye të PD me premtimin për të bashkuar të gjithë frontin e djathtë dhe po mbyll mandatin duke përçarë edhe vetë Partinë Demokratike. Ai e ktheu këtë parti nga një familje politike në një biznes familjar. Ai përbuzi për 4 vite me radhë simbolet historike të PD si dhe çdo forum të saj (edhe pse i zgjodhi vetë siç desh).

Ai nuk fitoi një betejë të vetme në krye të PD dhe i çoi mbështetësit e djathtë në një dështim dhe dëshpërim katastrofik. Ai i kërkoi aleancë çdo lloj soj sorollop elementi, por kurrë një herë nuk bëri një aleancë më zgjedhësit e PD. Ai flirtoi herë më mbështetësit e tij privatë, herë me LSI e herë me PS, gjithmonë në kurriz të PD dhe vetëm për përfitim personal. Ai ia doli të kthente të parën forcë politike pro-perëndimore, në një parti politike në konflikt të hapur me perëndimin e vlerat e tij.

Po, po? Ka plot arsye pse ai në krye të PD është i dëmshëm. Por përtej faktit që ai është një personazh që tenton të gënjejë edhe veten para pasqyrës, përtej faktit që, megjithëse drejtues i PD, ai ka patur e ka axhendë krejt të ndryshme nga PD, përtej faktit që nuk ka asgjë perëndimore në metodën e tij të sundimit të partisë apo të ushtrimit të funksioneve publike, sot ka një aryse edhe më madhore për mbështetësit e PD për ta konsideruar një kërcënim Bashën në rizgjedhjen e tij si kryetar në një pseudo garë tashmë të paracaktuar.

Por e keqja më e madhe që i vjen PD-së nga sundimi Basha është fakti që ai, brenda PD-së, është garanti i vetëm i marrëveshjes okulte me Ramën. Pa asnjë princip politik, pa asnjë moral, pa asnjë përfitim politik për vendin dhe për PD, Basha këputi një pazar që e vendos PD-në në pozitat e një opozite me ?leje? nga qeveria. Shërbimi më i madh që Basha po i bën Rilindjës është përçarja, lodhja, frustrimi i mbështetësve të PD. Qartazi edhe sot axhenda e Bashës është në konflikt me axhendën e PD.

PD, që të mos asgjesohet ka nevojë që të drejtohet. Për të garantuar paktin/pazarin Bashës i duhet ta sundojë PD-në. PD që të mos asgjesohet ka nevojë të bashkohet. Për të garantuar paktin/pazarin Bashës i duhet që ta përçajë. PD që të mos asgjesohet ka nevojë për kauza të vërteta. Për të garantuar paktin/pazarin Bashës i duhet të braktisë kauzat e vërteta. PD që të mos asgjesohet ka nevojë të jetë e vërtetë dhe e besueshme. Për të garantuar paktin/pazarin Bashës i mjafton të jetë vetvetja në përbetimet e rreme për të ?hapur partinë?, për ?rolin e anëtarësisë? etj.

Ky konflikt justifikon logjikisht veprimet prej anadollaku të kryetarit formal te PD. Kjo justifikon edhe valën e paguar të sharjeve, fyerjeve dhe thirrjeve për përzënjen e kritikëve nga partia, me qëllim ?pastrimin? e partisë nga kritikët e ?udhëheqësit të lavdishëm (?I)?. Përbetimet për besnikëri ndaj sundimtarit japin një tablo të zymtë për të ardhmen e kësaj partie.

Sot PD është në një ditë të keqe, jo sepse janë shtuar zërat kritikë ndaj sundimit Basha, por sepse është shtuar arroganca e sundimit Basha. Nuk i vjen e keqja PD-së nga kritikat, qofshin ato edhe të rënda, për sa kohë janë të vërteta. Madje i vetmi problem që i vihet përballë, jo pa të drejtë, kritikëve të Bashës është mosngritja e

zërit më herët. Në fakt këtu, për ndershmëri argumenti, duhet thënë diçka që kritikët e Bashës nuk e kanë shumë për zemër ta pohojnë. Dekadenca e sundimit të sotshëm nuk ka filluar me Bashën, vetëm po kulmon me të. Nuk mund të mohohet që këtij fenomeni të sundimit dekadent që PD po përjeton sot, i është hapur (madje i është pastruar) rruga nën drejtimin dhe bekimin e Berishës.

Nuk dua të besoj se ai nuk e ndjen përgjegjësinë për këtë, por kjo nuk ia zvogëlon dot këtë përgjegjësi. Nuk arrij dot të besoj gjithashtu që Berisha nuk është influent në zhvillimet e brendshme të PD, por fatkeqësisht jam i kufizuar të kërkoj përgjegjësinë institucionale për katastrofën elektorale të PD, por edhe për dështimin me qëllim të proceseve të brendshme politike, tek drejtimi formal i partisë.

Sot është e rëndësishme që atyre që u dhëmb me të vërtetë PD-ja (jo atyre që kanë bërë thjesht llogaritë e mbijetesës në sajë të ymrit që jep sundimtari), t?u bëhet e qartë e keqja që sot i vjen PD-së nga ky sundim anadollak. Sot mund të jemi në një ditë të keqe, por që edhe e nesërmja mos të jetë e tillë, e vërteta duhet thënë të paktën sot.

Dukshëm, Lulzim Basha, me 18 Maj, ka bërë një pazar përmbajtja dhe qëllimi i të cilit nuk është bërë ende publik. Por tashmë është edhe më e qartë që ai këtë pakt nuk e ka paguar me humbjen e 25 Qershorit. Ai këtë pakt/pazar do ta ?paguajë? duke ia garantuar ortakut në pazar sundimin e PD, përçarjen e saj, duke ia garantuar ta bëjë PD-në të pavërtetë dhe të pabesueshme si vetja, dhe mbi të gjitha, do e paguajë duke ia garantuar humbjen e kauzës opozitariste të PD./CityNews