Majlinda Bregu jep dy lajme të mira nga Samiti i Triestes/Rëndësi ka zgjimi!

13 Korrik 2017, 16:02, Aktualitet CNA

Ish-deputetja e Partisë Demokratike, Majlinda Bregu, ka komentuar Samitin e Triestes, duke ndarë prej tij dy lajme të mira.

Në rrjetet sociale, Bregu shkruan se lajm i mirë ishte deklarimi i qartë i Presidentit të Francës se Evrfopa ka nevojë të rithemelohet në bazë të një projekti konkret, si dhe vëmendja e shtuar për forcimin e bashkëpunimit rajonal dhe marrëdhëniet e fqinjësisë së mirë mes vendeve tona.

Më tej, ish-deputetja e PD shton se nëse CEFTA nuk do ishte lënë “të plakej” si ide dhe do të ishte përshtatur sipas zhvillimeve të reja në rajon, sot do të ishte e mjaftueshme për të na integruar si treg mes vetes.

Reagimi i plotë:

Për mua dy janë lajmet e mira nga Samiti i Triestes: deklarimi i qartë i Presidentit Francez Macron, se: “Europa ka nevojë të rithemelohet në bazë të një projekti konkret”, -deklaratë e cila rikthen aleancën Paris-Berlin jo vetëm për vendimet e vështira që i duhet të marrë BE sot, por edhe për të qartësuar një axhendë të re se c’lloj e ardhme parashikohet për Ballkanin Perëndimor në Europë; dhe vëmendja e shtuar për rëndësinë që ka forcimi i bashkëpunimit rajonal dhe marrëdhëniet e fqinjësisë së mirë mes vendeve tona.
Ajo që vjen prej Summit të Triestes nuk ndryshon aspak rrugën e përpjetë e të tatëpjetë të demokratizimit asnjëherë të përfunduar në vendet e Ballkanit Perëndimor, as shpejton anëtarësimin dhe as qetëson lodhjen e dy palëve nga një proces i gjatë ku ka më shumë fjalë se realitete të prekshme, por pas kaq vitesh ka një ide konkrete: pa integrim rajonal, zhvillim ekonomik e infrastrukturor nuk ia dilet trysnisë së tregut të përbashkët europian.
6 vendet tona kanë të paktën 76% të volumit të shkëmbimit tregtar me BE dhe kjo është mundësuar përmes Marrëveshjes së Tregtisë së Lirë me Vendet e Europës Qëndrore (CEFTA), në fuqi prej 2007.
Nëse CEFTA nuk do ishte lënë “të plakej” si ide, dhe do të ishte përshtatur sipas zhvillimeve të reja në rajon, sot do të ishte e mjaftueshme për të na integruar si treg mes vetes.
Nëse integrimi rajonal apo tregu i përbashkët rajonal, do të funksionojë tamam, do të ketë sipas FMN një rritje prej 4% të GDP në vit që do të thotë diku tek 17 miliard euro më shumë në vit për investime, vende të reja pune e zhvillim ekonomik real. Të shohim. Sot për sot rëndësi ka zgjimi!/CityNews