Prangat mbi Myftarajn, vasalitet i politikës shqiptare ndaj guvernatorëve të huaj

10 Maj 2017, 10:33, Aktualitet CNA

Mbrëmjen e djeshme, rreth orës 23:30, gazetar-analist-polemisti i mirënjohur, Kastriot Myftaraj, është shoqëruar nga forcat policore të antiterrorit për tu hetuar nën regjim burgimi, pas një shkrim-portreti që ka publikuar në faqen e tij në rrjetet sociale.

Në qendër të shkrim-portretit ishte ambasadorja e Bashkimit Europian në Shqipëri, gjë që, nga sa duket, është edhe shkaku që ka provokuar ndërmarrjen e masës së menjëherëshme ekstreme të arrestimit në rrethmesnatë të Myftarajt. Dhe, për më tepër, nga forcat policore të antiterrorit, çka është parathënie e zymtë për fatin e mëtejshëm të raportit të tij me drejtësinë.

Reagimi i ashpër i strukturave zyrtare, e përsërisim: ka ardhur pasi në qendër të shkrimit goditës ka qenë Romana Vlahutin, amabasadorja e BE-së, e qenë prezente dhe tepër aktive në mediatimin e politikës shqiptare drejt BE-së, përkrah ambasadorit amerikan Donald Lu.

E përmendëm ambasadorin Lu, pasi edhe ndaj tij, sikurse dhe ndaj të tjera figurave publike, Myftaraj ka publikuar shkrime polemiste, por ka adresuar edhe fraza konkrete gjatë daljeve të tija nëpër ekranet televizive. Sigurisht jo aq të ashpra. Të mbarsura me më pak fraza patetizmi negative, nga ato që i ka adresuar znj.Vlahutin, megjithatë të pajustifikueshme për mënyrën e kundër-reagimit të institucioneve të shtetit.

Sepse Kastriot Myftaraj nuk ka asnjë lidhje me terrorizmin, e as me qënien thirrës publik për ndërmarrjen e veprimeve të dhunëshme, sikurse akuzohet. Përkundër asaj që tregon paraqitje e tij fizike, Myftaraj është nga ata tipa njerëzish që nuk ?therr dot as edhe një pulë?, por padyshim që është i rrallë në llojin e polemistëve të pandreqshëm provokativ.

Duke e njohur mirë thelbin e tij, ne jemi të bindur se edhe në rastin me znj. Vlahutin ai nuk ka patur asnjë qëllim tjetër përpos ushtrimit të polemikës provokuese, që është e pajistifikuar për kalimin e kufirit profesional dhe atij qytetar.

E theksojmë Kastriot Myftaraj kursesi nuk është terrorist, ndaj dhe nuk ka pse trajtohet si i tillë. Të paktën fizikisht. Sepse nëse në vend të znj. Ambasadore do të ishte një tjetër personazh, jo diplomatik, kemi bindjen se Myftaraj nuk do të ishte në një situatë të tillë, të rrjedhur më së shumti nga vasaliteti i politikës sonë ndaj guvernatorëve të huaj. /CityNews