E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Trafikantët “luftë” plumbash me policinë/Nuk shpëtojnë mbi 100 kg drogë

30 Prill 2017, 13:32, Aktualitet CNA

Policia e Kufitare ka parandaluar dhe goditur një tentativë për trafik ndërkombëtar të lëndëve narkotike. Ngjarja ka ndodhur në Viçisht-Bulqizë, ku autorët, që udhëtonin dy me motor dhe dy me automjet, nuk i janë bindur urdhrit të policisë për të ndaluar. Ata janë larguar me shpejtësi, duke rrezikuar jetën e punonjësve të Policisë Kufitare.

Gjatë ikjes me shpejtësi, dy shtetasit që udhëtonin me motor dyshohet se kanë qëlluar me armë zjarri në ajër.

Policia Kufitare është vënë në ndjekje të tyre ku ka bërë të mundur kapjen dhe arrestimin e dy shtetasve së bashku me automjetin e tyre të fshehur në një rrugë dytësore. Gjatë kontrollit të zonës përreth ku ishin fshehur autorët Policia gjeti dhe sekuestroi katër thasë të mbushur me pako me lëndë narkotike Marijuanë me peshë rreth 105 kilogramë.

Rreth orës 23.30 në zonën kufitare Viçisht (territor i Bulqizës-kufi me Maqedoninë), shërbimet e Policisë Kufitare, gjatë patrullimit në kufirin e gjelbër kanë konstatuar një motorr dhe një automjet që po lëviznin me shpejtësi në drejtim të kufirit me Maqedoninë. Policia ka tentuar të ndalojë motorrin dhe më pas automjetin por nuk ka mundur pasi janë larguar me shpejtësi duke rrezikuar jetën e punonjësve të patrullës së Policisë. Gjatë momentit të largimit me shpejtësi, dyshohet se pasagjeri i motorit ka qëlluar me armë zjarri në ajër.

Shërbimet e Policisë janë vënë në ndjekje dhe kanë kërkuar përforcime. Si rezultat i ndjekjes dhe kontrollit të zonës është bërë e mundur që në një rrugë dytësore, policia të gjejë dhe bllokojë automjetin si dhe të arrestojnë në flagrancë drejtuesin e automjetit dhe pasagjerin që udhëtonte me këtë mjet. Po në vijim të kontrollit të zonës, në afërsi të automjetit janë gjetur dhe sekuestruar 4 thasë, ku brenda tyre kishte 15 pako më lëndë narkotike, gjithsej rreth 105 kilogramë Marijuanë. Ndërkohë, vijon kontrolli i zonës për gjetjen e motorit dhe kapjen e dy personave që qarkullonin me të. Në vendngjarje ka mbërritur grupi hetimor dhe Specialistët për Narkotikët në Drejtorinë Vendore të Policisë Dibër.

Në përfundim të veprimeve të para të kryera nga Specialistët për Narkotikët, është bërë arrestimi në flagrancë i shtetasve: Ridjan Miftari, 26 vjeç, banues në Gjoricë Bulqizë, (drejtues i automjetit me të cilin transportohej lënda narkotike). B. I., 17 vjeç, banues në Zall-Strikçan, Zerqan (pasagjer në automjetin që transportohej lënda narkotike). Gjithashtu po në vijim të veprimeve u bë shpallja në kërkim e shtetasve A.XH, dhe B.O, ku vijon puna për kapjen e tyre.

Në cilësinë e provës materiale u sekuestruan 105 kg lëndë narkotike marijuanë, automjeti tip “Fiat”, si dhe dy telefona celularë. Ndërkohë, në vendngjarje vijon puna për gjetjen e gëzhojave si dhe të armës së zjarrit me të cilën dyshohet se ka qëlluar në ajër në ikje e sipër pasagjeri që qarkullonte me motor. Specialistët për Narkotikët në D.V.P. Dibër po bashkëpunojnë me Prokurorinë për Krimet e Rënda Tiranë për zbardhjen dhe dokumentin e plotë të kësaj ngjarje.

Materialet i kaluan Prokurorisë për Krimet e Rënda Tiranë për veprat penale “Trafikimi i narkotikëve, kryer në bashkëpunim”, parashikuar nga neni 283/a e 25 të Kodit Penal.